13:05 / 31.03.2020
35206

Хитойдан 200 мингта тест-системаси сотиб олинди

Ўзбекистон Республикаси президенти топшириғи билан Хитойдан зарур тиббий техника ва ҳимоя воситалари олиб келинди.

28 март куни Ўзбекистон Республикаси президенти Шавкат Мирзиёевнинг топшириғига мувофиқ Хитойдан 27,8 млрд сўмга вирусни аниқлайдиган 200 мингта тест-системаси ҳамда 50 мингта бир марталик бош кийимли ҳимоя комбинезони сотиб олинди. Kun.uz мухбири хабар беришича, ҳарбий самолётда олиб келинган тиббий юкнинг умумий оғирлиги қарийб 20 тоннани ташкил этади. 

Шунингдек, ушбу махсус рейсда Хитой Халқ Республикаси томонидан берилган 2,5 млрд сўмлик турли тиббий буюмлар шаклидаги инсонпарварлик ёрдами ҳам келтирилган.

Бундан ташқари, 31 март куни Вазирлар Маҳкамасининг тегишли қарорига асосан 16 млрд сўмлик, 3 апрелда эса қўшимча 45 млрд сўмлик тиббий техника ва ҳимоя воситалари коронавирусга қарши курашиш учун ажратилган маблағлар ҳисобига сотиб олинади ва ҳарбий самолётда олиб келтирилади.

Жумладан, хорижий тажрибани кенг ўрганган ҳолда соғлиқни сақлаш ходимлари учун алоҳида 2 даражали яъни, «қизил зона»га мўлжалланган махсус комбинезонларни харид қилишга ҳам эътибор қаратилган.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top