Сингапурда коронавирус сабабли ёши 21дан ошган ҳар бир фуқарога маблағ ажратилади

Сингапур ҳукумати коронавирус эпидемияси сабабли бизнес ва аҳолига учинчи ёрдам пакетини эълон қилди. Бунинг учун яқин вақт ичида захира фондидан маблағ ажратилади, деб хабар берди CNBC.

Ҳукумат қарорига мувофиқ, Сингапурнинг 21 ёшдан катта бўлган ҳар бир фуқароси 600 сингапур доллари ($417) миқдорида маблағ олади.  

Бизнесга ҳам маблағ ажратилади. Ҳукумат апрел ойи учун маошларни тўлаб беришга ваъда берди. Турли ҳисоб-китобларга кўра, бунинг учун захира фондидан 2,9 млрд доллар атрофида маблағ олинади.

Ҳисоб рақамлари тўғрисида маълумот тақдим этганларга пул ҳисоб рақамларига тушириб берилади, қолганлар нақд пул олади.

Сингапур молия вазири ушбу тўловларни олишдан ўз ихтиёри билан воз кечган фуқароларга миннатдорлик билдирди. Унинг сўзларига кўра, бу пуллар ўта муҳтожларга берилади. 

Сингапурда 1309 киши коронавирусга чалингани қайд этилган, олти киши вафот этган.