Aсли Наманган вилоятидан бўлган, ҳозирда Замбия Республикасининг Россия ва МДҲ давлатларидаги ваколатхонасида фаолият юритиб келаётган ватандошимиз Камолиддин Мелибоев ҳам мусофирчиликда кўплаб қийинчиликларга дуч келган. У биз билан суҳбатда мусофирчиликда бошидан кечирганлари, Россиядаги ҳаёт ва муваффақиятлари ҳақида сўзлаб берди.
Россияга 2010 йилда келганман
2010 йилда турмуш ўртоғим билан Россияга келиб, кўп қийинчиликларни бошдан кечирдик. Оғир ишларни қилишимизга ҳам тўғри келди. Катта пул билан келмаганмиз – Россияга келадиган инсон биринчи навбатда пул топиш учун келади. Турмуш ўртоғим билан нолдан бошлаганмиз. Икки кун ресторанда, қолган вақти кўчада турли ишларни қилар эдим.
Мақсадимиз аниқ экан, мана, шу ергача етиб келдик. Москванинг Арбат кўчасида реклама тарқатувчи бўлиб ишладим. Кун жудаям совуқ эди у вақтларда. Қийинчиликка дуч келганда уйга кетиш фикри ҳам бўлган, лекин ор-номус қилиб, қариндош-уруғ, дўсти-душмандан уялганмиз.
Дастлаб Покистон элчихонасига ишга кирдим
Москвадаги шифохоналардан бирида бир дипломат билан танишиб қолдим. Дастлаб Покистон Ислом Республикаси дипломатик ваколатхонасига қора ишчи бўлиб кирганман. Кейин ҳайдовчи бўлдим. 1 йилдан кўпроқ вақт давомида ҳайдовчи бўлиб ишладим. Кейин офисга ишга ўтганман.
Шу билан 2,5 йил Покистон Ислом Республикаси элчихонасида админстратив-атташе бўлиб ишладим.
Мусофирчиликда ҳалоллик ва тўғрилик билан ишласа, ҳар қандай мақсадига эришади
2007 йилда Наманган муҳандислик-иқтисодиёт институтини бухгалтерия ҳисоб-аудит йўналишини тамомлаганман. Лингвистикага умуман алоқам бўлмаган. Ҳайдовчи бўлиб ҳам, элчихона офисигача борса бўлишини ҳамкасбларимдан эшитиб қолдим. Шундан кейин инглиз тилини ўрганишни бошладим. Ҳар бир дипломатдан кунига сўз ўргандим.
Ҳайдовчилигимда дипломатларнинг фарзандларини мактабга олиб борар эдим. Бу менга яхши имконият бўлган. Ёш болалар билан гаплашиш кўпроқ тажриба бўлди. 1 йил ичида инглизчадан эркин сўзлашадиган даражага чиқдим. Ҳозирда инглиз ва рус тилида бемалол гаплашаман; урду ва турк тилларида фикримни тушунтира оламан.
