Буюк Британияда карантин чоралари юмшатилмоқда

Аҳолига офтобда тобланиш, машина миниш, спорт билан шуғулланишга рухсат берилади. Икки киши спорт билан шуғулланганида улар бир оилада яшайдиганлар бўлиши лозим.

Фото: REUTERS

Буюк Британия бош вазири Борис Жонсон аҳолига телемурожаати чоғида Англия ҳудудида 13 майдан коронавирус тарқалишига қарши жорий этилган чекловлар юмшатилишини маълум қилди.

Хусусан, аҳолига офтобда тобланиш, машина миниш, спорт билан шуғулланишга рухсат берилади. Икки киши спорт билан шуғулланганида улар бир оилада яшайдиганлар бўлиши лозим.

Жонсон аҳолини ижтимоий масофа сақлашга чақирди ҳамда ушбу қоидани бузганлар учун жарима миқдорларини оширилишини айтди.

У шунингдек, хориждан келувчилар карантинга олинишини таъкидлади.

Жонсоннинг билдиришича, ҳукумат коронавирус билан боғлиқ вазиятни кузатади ва чекловларни босқичма-босқич бекор қилишни давом эттиради. Чекловларни юмшатишнинг кейинги босқичи 1 июнда бошланиши мумкин.

Кўплаб жамоат жойлари очилишига рухсат бериладиган учинчи босқич июлда бошланиши кутилмоқда.

Worldometers сайтининг маълумот беришича, Буюк Британияда коронавирус юқтирганлар сони 219 мингдан ошган, 32 мингга яқин киши вафот этган.

Тайёрлаган Дилшод Аскаров

#Буюк Британия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.