Британиянинг Jaguar компанияси Type 01 серияли электромобилини тақдим этди. Янги модел Британия маркаси тарихидаги энг қувватли автомобилга айланди ва у келаси йили сотувга чиқарилади
Янги автомобил Type 00 концепциясининг серияли талқини бўлиб, унинг дизайни автомобил ишқибозлари ва мутахассислари орасида турлича баҳоланган эди. Модел узун капот, ингичка диодли оптика, шаффоф том, узайтирилган орқа осма, бўртган спойлер ҳамда 23 дюймли ғилдирак дискларига эга бўлди. Бироқ икки эшикли прототипдан фарқли ўлароқ, серияли фастбэк тўрт эшикли гран-туризмо кўринишида яратилди.
Янги моделда одатий радиатор панжараси ўрнини горизонтал чизиқли қоплама эгаллаган. Шу билан бирга, электромобилнинг орқа ойнаси йўқ. Бундай ечим илгари Avatr 12 ва Polestar 4 моделларида ҳам қўлланилган эди. Аэродинамик қаршилик коэффициенти — 0,23 ни ташкил этади. Бу Jaguar автомобиллари учун рекорд кўрсаткичдир.
Интерернинг асосий ўзига хослиги бутун салон бўйлаб чўзилган ва уни алоҳида ҳудудларга ажратиб турувчи узун марказий консол бўлди. Унда анъанавий тугмалар йўқ. Автомобилнинг асосий функция ҳамда тизимларини 7 дюймли экран ва рул чамбароғидаги сенсорли панеллар орқали бошқариш мумкин.
Шу билан бирга, Jaguar Type 01 моделида мултимедиа тизими экрани йўқ. Барча зарур кўрсаткичлар, жумладан, навигация маълумотлари диагонали 24 дюйм бўлган улкан рақамли асбоблар панелида акс этади. Яна битта экран эса рақамли орқа кўриниш кўзгуси вазифасини ўтайди, унга тасвир томга ўрнатилган камера орқали узатилади.
Type 01 850 волтли архитектурага асосланган янги Jaguar Electric Architecture (JEA) платформасида ишлаб чиқилган. Автомобил умумий қуввати 1030 от кучи ва 1365 Н·м айланма лаҳзага эга учта электромотор билан жиҳозланган. Машина 100 км/соат тезликка бор-йўғи 3,2 сонияда эришади. Электромобилнинг бир қувватланишдаги юриш захираси 720 км ни ташкил қилади. Батарея қувватини 10 фоиздан 80 фоизгача 22 дақиқада тўлдириш мумкин.
Янги моделга буюртмалар қабул қилиш 2027 йилда бошланади. Автомобилларни харидорларга дастлабки етказиб бериш эса келаси йилнинг иккинчи ярмига режалаштирилган. Моделнинг Буюк Британиядаги нархи 130 минг фунт стерлингдан (2026 йил 7 октябр ҳолатига кўра тахминан 2 миллиард сўм) бошланади.
