Бухоролик расмийлар қоракўллик тадбиркорнинг лойиҳаси ҳоким қарорига мос эмас дейишмоқда. Лекини бор...

Kun.uz сайтида 25 май куни «Қоракўллик тадбиркорнинг қора кунлари: фаолиятига ҳоким тўсқинлик қилаётган чоғда унга табиат ҳам талафот етказди» сарлавҳаси остидаги мақола эълон қилинган эди.

Унда Бухоро вилояти Қоракўл туманидаги «Amirzoda Trade» МЧЖ раҳбари Жўрабек Турдиевнинг тадбиркорлик фаолиятида дуч келаётган муаммолар ҳақида сўз боради.

Ушбу мақола юзасидан таҳририятга Бухоро вилоят қурилиш бош бошқармаси бошлиғи Ҳ.Давлатов имзоси билан расмий муносабат йўлланди. Унда айтилишича, Қоракўл туман ҳокимининг 2018 йил 29 сентябрдаги 1383-сонли қарорида ҳамда лойиҳа олди ҳужжатлар тўпламларида (архитектура режалаштириш топшириғи), ажратилган ер майдонида «3 қаватли автомобиллар тўхташ жойи ҳамда ҳожатхона» биноси қурилиши кўзда тутилган.

Лекин лойиҳа ташкилоти буюртмачи («Amirzoda Trade» МЧЖ) талаби билан лойиҳа таклифларини тайёрлаш жараёнида асоссиз ҳамда ушбу ҳудуднинг бош режасига зид равишда, ҳудудда режалаштирилмаган, яъни биринчи вариантда: «Савдо дўконлари ва автомобиллар тўхташ майдончаси» ҳамда иккинчи вариантда: «Супермаркет (юқори қисмида очиқ кафе) ва супермаркет учун автомобиллар тўхташ майдончаси» объектларнинг лойиҳа таклифлари ишлаб чиққани сабабли, вилоят бош архитектори З.Муҳиддиновга, лойиҳа ташкилоти томонидан тақдим этилган лойиҳа таклифлари «келишилмаган».

Шунингдек, вилоят бош архитектори З.Муҳиддинов томонидан лойиҳа ташкилоти Аслбек Жўраевга, ҳудуднинг бош режасидан келиб чиққан ҳолда, Қоракўл деҳқон бозори атрофида ва яқин ҳудудларда автотураргоҳлар йўқлиги, бозор атрофида автотранспорт воситалари тирбандлигини камайтириш, шунингдек, туман ҳокими қарорида кўрсатиб ўтилган «3 қаватли автомобиллар тўхташ жойи ҳамда ҳожатхона» биноси қурилишининг лойиҳа таклифларини ишлаб чиқиш лозимлиги тўғрисида тушунтирилган.

«Ажратилган ер майдонида, лойиҳа ташкилоти томонидан қурилиши режалаштирилган «3 қаватли автомобиллар тўхташ жойи ҳамда ҳожатхона» биноси лойиҳа смета ҳужжатлари тайёрлаб, белгиланган тартибда вилоят Қурилиш бош бошқармасига тақдим этилса, вилоят бош архитектори томонидан «келишиш» жараёнида ҳеч қандай эътироз йўқлигини маълум қиламиз», дейилади расмий муносабатда.

Шунингдек, Қоракўл туман ҳокимлиги ҳам телеграмдаги расмий каналида ушбу мақола юзасидан расмий баёнот эълон қилган.

Бухоро вилоят қурилиш бош бошқармаси расмий муносабатини деярли такрорловчи мазкур баёнотда Қоракўл тумани ҳокимининг 2018 йил 29 сентябрдаги «Тумандаги «Эски-қалъа» маҳалла фуқаролар йиғини Тош кўчасида «AMIRZODA TRADE» масъулияти чекланган жамиятига замонавий лойиҳалар асосида 3 қаватли автомобиллар тўхташ жойи ҳамда ҳожатхона биносини қуриш учун доимий фойдаланиш ҳуқуқи билан ер майдони ажратиш тўғрисида»ги 1383-сонли қарори қабул қилинган бўлиб, ушбу қарор билан, «AMIRZODA TRADE» МЧЖга (раҳбари М.Турдиева) 0,22 гектар ер майдони доимий фойдаланиш ҳуқуқи билан ажратилгани, МЧЖ туман ҳокими қароридан четга чиқиб, лойиҳага ўзгартириш киритгани, 1383-сонли қарорда кўрсатилган 3-қаватли автотураргоҳ объектини лойиҳалаштириб, тасдиқлашда муаммолар бўлмаслиги баён этилган.

Бу борада мурожаатчи Жўрабек Турдиевга билдирганимизда, у туман ҳокимининг 2018 йил 29 сентябрдаги №1383-сонли қарорига қисман ўзгартириш киритиш ҳақида Қоракўл тумани ҳокимининг 2019 йил 18 майдаги №2735-сонли қарори қабул қилингани, унга кўра автотураргоҳ бир қаватли қилиб қурилишига, шунингдек, қўшимча бинолар қурилишига рухсат берилгани ҳақида айтди. Кейинги, тасдиқдан ўтмай турган лойиҳалар шу қарорга кўра лойиҳаланган.

Туман ҳокимлиги ўз баёнотида табиий офат натижасида талафот кўрган ишлаб чиқариш корхонаси борасида тўхталар экан, Жўрабек Турдиев қурилиш ва шаҳарсозлик меъёрлари асосида лойиҳалаштирилиб қурилмаган бинога видеоматериалда таъкидланган миқдордаги қурилиш материалларини олиб келиб жойлаштирганини таъкидлайди.

«Бунга қарамасдан, табиий офатдан зарар кўрган тадбиркорга ёрдам қўлини чўзиш мақсадида, Бухоро вилояти ҳокимининг талафот оқибатларини бартараф этиш бўйича вақтинчалик низомнинг 8-банди (Марказий банк ва республика тижорат банкларига табииий офатдан зарар кўрган тадбиркорлик субъектларига талафот кўрган объектларини таъмирлаш ва тиклаш учун қисқа муддатда зарур миқдордаги кредит маблағларини ажратиш чораларини кўриш, бунда фоиз ставкасининг бир қисмини қоплаш учун Тадбиркорлик фаолиятини қўллаб-қувватлаш давлат жамғармаси томонидан компенсация тўланишига рухсат бериш)га мувофиқ, «Ёшлар келажагимиз» жамғармасининг Қоракўл тумани бўлими томонидан таклиф қилинган кредит маблағлари ҳам Ж.Турдиев томонидан рад этилган.

Тадбиркор Жўрабек Турдиевга тегишли бинодаги талафот оқибатлари Миллий банкнинг Бухоро вилоят мутасаддилари томонидан далолатнома асосида ўрганиб чиқилди ва бу талафот оқибатини бартараф қилишга оид барча маълумотлар туман ҳокимлигининг ижтимоий тармоқлардаги расмий саҳифалари орқали эълон қилиб борилади», дейилади баёнотда.

Туман ҳокимлиги Ж.Турдиев томонидан ҳокимлик биноси ва майдонида бажарилган ишлар бўйича бирорта ҳужжат топилмаганини қайд этади. Фақатгина, Қоракўл тумани ҳокимлигининг орқа қисмида жойлашган ёзги айвоннинг смета ҳужжатлари қилинган бўлиб, аммо тадбиркорнинг бу иншоотни қуриш бўйича туман ҳокимлиги билан шартномаси мавжуд эмас.

Шунингдек, Қоракўл тумани ҳокимлиги Ўзбекистон Республикаси «Маҳаллий давлат ҳокимияти тўғрисида»ги қонунидан келиб чиқиб, туман ҳокими Шерали Саломовнинг Жўрабек Турдиевни жавобгарликка тортиш бўйича Қоракўл туман ИИБ раҳбари биринчи ўринбосари Ж.Тангриевга топшириқ бермаганини, бундан ташқари, Жўрабек Турдиев содир этган ҳуқуқбузарлиги учун ҳозирги вақтда Қоракўл тумани ИИБда Ўзбекистон Республикаси МЖтКнинг 54- (Эпидемияларга қарши кураш қоидаларини бузиш), 183- (Майда безорилик) ҳамда 194- (Ички ишлар органлари ходимининг қонуний талабларини бажармаслик) моддаларига асосан тўпланган маъмурий иш ҳужжатлари борлигини ҳам маълум қилган.