Юридик ва жисмоний шахсларни электр тармоқларига улаш тартибида ўзгариш юз беради

Вазирлар Маҳкамасининг “Истеъмолчиларни электр тармоқларига уланиши бўйича давлат хизматлари кўрсатишнинг маъмурий регламентларини тасдиқлаш тўғрисида”ги қарори лойиҳаси эълон қилинди.

Вазирлар Маҳкамасининг 2018 йил 31 мартдаги 256-сон қарори билан тасдиқланган Юридик ва жисмоний шахсларни электр тармоқларига улаш бўйича давлат хизматлари кўрсатишнинг маъмурий регламенти янги таҳрирда тасдиқланади.

Қайд этилишича:

Регламентга мувофиқ истеъмолчиларни электр тармоқларига улаш босқичлари уланган қуввати 50 киловаттгача бўлган истеъмолчиларда тўрттадан биттага ва 50 киловаттдан юқори истеъмолчиларда тўрттадан иккитага туширилган;

уланган қуввати 50 киловаттгача бўлган истеъмолчиларни тармоққа улаш учун “Оферта” имзолаш орқали 1 маротабалик тўловни амалга ошириш механизми жорий этилади;

истеъмолчиларни электр тармоқларига улашнинг барча босқичлари тўлиқ рақамлаштирилган ҳолда “ELEKTR” дастурий таъминоти (Онлайн платформа) орқали амалга оширилади;

Онлайн платформани ишлаб чиқиш учун маҳаллий дастурчилар, шу жумладан “IT Park Uzbekistan” резидентлари ўртасида конкурс танловлари ўтказилмоқда.

Белгиланишича:

2020 йил 1 декабрдан бошлаб Регламентга мувофиқ юридик ва жисмоний шахсларни электр тармоқларига улаш давлат хизматлари марказлари, ягона интерактив давлат хизматлари порталида (ЯИДХП) ва Онлайн платформа орқали амалга оширилади;

2020 йил 15 ноябргача электр тармоқларига уланиш бўйича давлат хизматлари марказлари ёки ЯИДХП орқали тузилган шартномалар бўйича фақат бошланғич тўлови ўтказилган ёки тегишли қурилиш ва лойиҳалаш ишлари бошланган объектлар амалдаги тартиб бўйича электр тармоқларига уланиши таъминланади;

Ўзбекистон Республикаси Вазирлар Маҳкамаси томонидан тасдиқланган рўйхатга асосан янги истеъмолчиларни тармоққа улаш учун 1 маротабалик тўлов бюджет маблағлари ҳисобидан молиялаштирилади.

Ўзбекистон Республикаси Энергетика вазирлиги, Адлия вазирлиги, Қурилиш вазирлиги, Ахборот технологиялари ва коммуникацияларини ривожлантириш вазирлиги, Монополияга қарши курашиш қўмитаси Регламент талабларидан келиб чиқиб:

бир ой муддатда давлат хизматлари кўрсатиш учун зарур ҳужжатлар ва бошқа ҳужжатларнинг намунавий шакллари, бланкалари ишлаб чиқилиши;

2020 йил 20 октябргача Онлайн платформани барча ҳудудий электр тармоқлари корхоналари, Ўзэнергоинспекциянинг барча ҳудудий бўлимлари, республикадаги барча давлат хизматлари марказларида ўрнатиб, ЯИДХПга интеграция қилинишини таъминлайди.

Юридик ва жисмоний шахсларни электр тармоқларига улаш бўйича давлат хизматлари кўрсатишнинг маъмурий регламентига кўра, электр энергиясини электр таъминоти шартномасини тузмасдан етказиб бериш тақиқланади.

Истеъмолчиларни электр тармоқларига улаш жараёни қуйидагиларни назарда тутади:

техник шартларни ишлаб чиқиш ва унга асосан “тайёр ҳолда топшириш” (қуввати 50 кВтдан юқори бўлган истеъмолчилар учун электр таъминоти лойиҳасини ишлаб чиқиш, қурилиш-монтаж ва ишга тушириш-созлаш ишларини бажариш учун) шартномаси (кейинги ўринларда – тайёр ҳолда топшириш шартномаси) лойиҳасини тақдим этиш;

электр энергияси таъминоти учун шартнома тузиш.

Бунда қуввати 50 кВтгача бўлган истеъмолчилар электр тармоғига уланиш бўйича бир марталик тўловни амалга оширади ва электр тармоғига ҳудудий электр тармоқлари корхонаси (ҲЭТК) томонидан улаб берилади, шунингдек электр энергияси таъминоти учун шартнома имзоланади.

Истеъмолчиларни электр тармоқларига улаш жараёнини амалга оширишда:

а) ҲЭТК ҳузуридаги электр тармоқларига юридик ва жисмоний шахслар электр қурилмаларини улаш хизматларини кўрсатиш хизмати:

техник шартларни ишлаб чиқади;

қуввати 20 кВтгача бўлган истеъмолчилар учун электр тармоқларга улаш схемасини ишлаб чиқади ҳамда қурилиш-монтаж ва ишга тушириш-созлаш ишларини бажаради;

қуввати 20 кВтдан 50 кВтгача бўлган истеъмолчилар учун электр тармоқларга улаш лойиҳа ҳужжатларини ишлаб чиқади ҳамда қурилиш-монтаж ва ишга тушириш-созлаш ишларини бажаради;

уланадиган қувват 50 кВтдан юқори бўлса “ELEKTR” дастурий таъминотига (Онлайн платформа) техник шартларни тайёр ҳолда шартнома лойиҳасини тузиш учун киритади;

қуввати 50 кВтдан юқори бўлган электр энергияси истеъмолчилари билан тайёр ҳолда топшириш шартномасини тузади (истеъмолчи манфаатдор бўлганда);

электр энергияси таъминоти учун шартнома тузади;

б) Онлайн платформа орқали тайёр ҳолда топшириш шартномани тузиш учун энг яхши таклифни тақдим этган ва истеъмолчи томонидан танланган ташкилот (Пудратчи) лойиҳалаштириш, қурилиш-монтаж ва ишга тушириш-созлаш ишларини бажаради (истеъмолчи манфаатдор бўлганда) ва электр таъминоти лойиҳасини Ўзбекистон Республикаси Энергетика вазирлиги ҳузуридаги Электр энергетикада назорат инспекцияси (Ўзэнергоинспекция) билан келишади электр қурилмаларини ишга туширишга тайёрлигини аниқлайдиган Далолатнома имзоланишини ташкиллаштиради;

в) Ўзэнергоинспекция:

қуввати 20 кВтдан юқори бўлган электр энергияси истеъмолчилари учун электр таъминоти лойиҳасини келишади;

қуввати 20 кВтдан юқори бўлган электр энергияси истеъмолчилари электр қурилмаларининг тайёрлигини аниқлайди ва Баённомани имзолайди;

г) Ўзбекистон Республикаси Бош прокуратураси ҳузуридаги Мажбурий ижро бюроси (Бюро) электр энергиясини ҳисобга олиш тизимини пломбалашда иштирок этади.

Давлат хизматлари марказлари, Ўзэнергоинспекция, Бюро, ҲЭТК ва Пудратчи ташкилотлар ўртасида ахборот алмашинуви электрон рақамли имзони (ЭРИ) мажбурий тартибда қўллаш орқали фақат идоралараро ўзаро электрон боғланиш ёрдамида амалга оширилади.