«Электрон тўловдан фойдаланиш тавсия этилади» – вазирлик Тошкент шаҳри аҳолисига мурожаат қилди

Транспорт вазирлиги Тошкент шаҳар бошқармаси пойтахт аҳолисини жамоат транспорти учун электрон тўловдан фойдаланишга чақирди.

«15 августдан бошлаб Тошкент шаҳрида барча жамоат транспортлари – автобус, микроавтобус, метрополитен ҳаракати тикланди. Қатнов чоғида аҳоли орасида инфекция тарқалишига йўл қўймаслик чоралари кўрилган.

Автобусларда ҳам, метрополитенда ҳам автоматлаштирилган тўлов тизими йўлга қўйилган бўлиб, йўловчилардан имкон қадар шу тизим хизматларидан фойдаланишни сўраган бўлардик. Бу пул орқали контакт бўлишини минималлаштиради. Транспорт картасини Тошкент шаҳри бўйлаб мавжуд бўлган 89та ойлик йўл чипталарини сотиш шохобчаларида ва метрополитеннинг барча кассаларида харид қилиш мумкин», деди Транспорт вазирлиги Тошкент шаҳар бошқарма бошлиғи Анвар Жўраев АОКА штабидаги брифингда.

Бошқарма бошлиғи жамоат транспортларида амал қилаётган санитар меъёрлар ҳақида маълумот берди.

«Тошкент шаҳрида 149та йўналишда 1100дан ортиқ автобус, 97та йўналишда 900дан ортиқ микроавтобус ҳамда 3та (Ўзбекистон, Чилонзор, Юнусобод) линияларида метрополитен ўз ҳаракатини бошлаган.

Автокорхонадан чиқаётганда ва 32та автошоҳбекатда автобусларнинг салонлари дезинфекция қилинади. Ҳайдовчи ва чиптачиларнинг тана ҳарорати текширилади, уларнинг қўлқоп ва тиббий ниқобда бўлиши таъминланади.

Метрополитенга кириш жойлари дезинфекция тоннеллари билан жиҳозланган, қўлларни дезинфекция учун антибактериал суюқликлар билан таъминланган. Вагонлар ҳар 3 соатда, станциялар кун давомида 4 марта дезинфекция қилинади.

Шунингдек, йўловчилардан ҳам санитария талабларига риоя қилиш сўралмоқда. Автобусга чиқишда улар тиббий ниқобда бўлиши, транспорт ичида ижтимоий масофага риоя қилишлари лозим. Йўловчилардан метрополитен станцияларига киришда тана ҳароратини ўлчашларига тўсқинлик қилмасликларини, бу зарурий чорага тушуниш билан ёндашишларини сўраб қоламиз», дея Жўраевнинг сўзларини келтирмоқда Kun.uz мухбири.