Ҳозиргача 11 мингга яқин ер участкаси аукцион савдосига қўйилди – Адлия вазирлиги

1 сентябрь ҳолатига кўра республика бўйича 10 минг 908та ер участкаси аукцион савдоларига чиқарилган бўлиб, шундан 4009таси сотилган. 6899таси аукцион жараёнида муҳокамада бўлиб турибди.

3 сентябрь куни «Тадбиркорлик ва шаҳарсозлик фаолиятини амалга ошириш учун бўш турган ер участкаларини бериш тартиб-таомиллари» мавзусида онлайн мулоқот ўтказилди. Унда тадбиркорлик ва шаҳарсозлик фаолиятини амалга ошириш учун бўш турган ер участкаларини «YERELEKTRON» автоматлаштирилган ахборот тизимига жойлаштириш, онлайн аукционда жисмоний ва юридик шахсларнинг иштирок этиш шартлари ва тартиби тушунтирилди.

Адлия вазирлиги хабарида қайд этилишича, қишлоқ хўжалигига мўлжалланмаган бўш турган ер участкалари тадбиркорлик ва шаҳарсозлик фаолиятини амалга ошириш учун доимий фойдаланишга берилиши, ер участкасини танлаш материаллари бўйича келишиш ва хулосалар бериш фақат «YERELEKTRON» ААТ орқали амалга оширилади. Аукцион натижалари тўғрисидаги баённома олди-сотди шартномаси кучига эга бўлиб, ушбу ер участкасидан доимий фойдаланиш ҳуқуқини аукцион ғолиби номига давлат рўйхатидан ўтказиш учун асос бўлади.

Онлайн-аукцион иштирокчисига айланиш учун тадбиркор www.e-auksion.uz сайтидан рўйхатдан ўтиши, ўзларини қизиқтирган объектни (ЛОТ) танлаши ва ариза бериши керак бўлади. Тўловларни тижорат банклари ёки электрон тўлов тизимлари (Payme, Click ва бошқалар) орқали амалга ошириш имконияти мавжуд.

Эслатиб ўтамиз, президент фармонига асосан 2019 йил 1 октябрдан бошлаб тадбиркорлик ва шаҳарсозлик фаолиятини амалга ошириш учун ер участкалари электрон онлайн-аукцион орқали берилиши белгиланган.