Марра чизиғини иккинчи бўлиб “Макларен” аъзоси Карлос Сайнс кесиб ўтган. 3-ўринни “Рейсинг Пойнт” пойгачиси Лэнс Стролл эгаллаган.
Пойга пешқадами ва амалдаги чемпион Льюис Ҳэмилтон светофорнинг қизил чироғига қарамай пит-лейнга киргани учун 10 сониялик жарима билан жазоланган. Пойга “Феррари” аъзоси Шарл Леклер иштирокидаги авария сабабли тўхтатилган. У давом эттирилгач Ҳэмилтон жазо сониялари сабабли охирги ўринга тушиб кетган. У қолган вақт давомида позициясини яхшилай олишга ва 7-ўринни эгаллашга муваффақ бўлган.
1995 йилдан бери биринчи марта Италия босқичида Ferrari’нинг икки пойгачиси - Шарль Леклер ва Себастьян Феттель трассадан чиқиб кетди.
Бир кун аввал Ҳэмилтон квалификация босқичида энг яхши вақтни намойиш қилганди. У бир айланани 1 дақиқа 18,887 сонияда ўтиб, чемпионат тарихидаги мутлақ рекордни ўрнатган.
Умумий ҳисобда Ҳэмилтон 164 очко билан пешқадамлик қилмоқда. 2-ўринни Валттери Боттас 117 очко билан, 3-ўринни Макс Ферстаппен 110 очко билан эгалламоқда.
Пойгаларнинг кейинги босқичи ҳам Италияда 11-13 сентябрь кунлари бўлиб ўтади.
