Россияда чет элликларга бармоқ изларини топшириш ва электрон ID олиш талаби қўйилиши мумкин

Россия ИИВ миграция қонунчилигини ислоҳ қилиш концепцияси ва «Россия Федерациясида хорижий фуқароларнинг ҳуқуқий мақоми тўғрисида»ги қонуннинг янги таҳририни тақдим этди. Уларга мувофиқ, Россияда барча муҳожирлардан бармоқ изларини олиш режалаштирилмоқда, деб хабар беради «Коммерсантъ» ИИВ Миграция масалалари бўйича бош бошқармаси бошлиғи Валентина Казакованинг Жамоатчилик палатасидаги нутқига асосланиб. 

ИИВ, хусусан, Россияда 30 кундан ортиқ вақт давомида бўлган барча муҳожирларга бармоқ излари, фотосурат, тиббий кўрикдан ўтиши ва ID-карталарни олиш мажбуриятини юкламоқчи. Казакова Россияга кириб келганларнинг ҳаммасидан бармоқ изларини олиш ғояси бир неча йилдан бери муҳокама қилинаётганини таъкидлади. Бироқ, илгари бармоқ изларини чегарада олиш ва бунинг учун барча постларда тегишли ускуналарни ўрнатиш ғояси кўриб чиқилган бўлса, ИИВ энди муҳожирларнинг ўзига келганидан кейин бармоқ изларини мустақил равишда топшириш мажбуриятини юклашни таклиф қилмоқда.

Казакованинг айтишича, ИИВ муҳожирларга Россиядан кириш мақсадини мамлакатни тарк этмасдан ўзгартириш имкониятини беришни таклиф этмоқда. Ҳозир кириш мақсадини фақат бир марта белгилаш мумкин. Маҳкама миграция қоғозларини электрон карталарга алмаштириш ниятида. Шунингдек, иш берувчиларнинг ягона электрон реестрлари пайдо бўлади. Россияда бундай реестр туфайли хорижий ишчи кучига квоталар тизимидан воз кечиш ҳамда бунинг ўрнига чет эллик ишчилар ва иш берувчилар бир-бирини қидириб, электрон тизим орқали ҳужжатларни расмийлаштириши мумкин бўлади.

Бундан ташқари, Россияда вақтинчалик яшаш учун рухсатнома (ВЯР) беришни тугатиш режалаштирилмоқда. «Биз ҳозирдаги каби вақтинчалик яшаш учун рухсатнома олиш институтидан воз кечиш ниятидамиз», - деди у. Ҳозир ВЯР уч йилга берилади, узайтирилмайди ва бутун амал қилиш муддати давомида Россияда бўлишга имкон беради. Шунингдек, у Россияда патент ва ишлаш учун рухсатномасиз ишлаш ҳуқуқини беради. ВЯРни олганидан сўнг, чет эл фуқароси яшаш учун рухсатнома (ЯУР) олиш мақсадида мурожаат қилиши мумкин.

ИИВ бунинг ўрнига учта миграция режими жорий этишни таклиф қиляпти: қисқа муддатли яшаш (90 кунгача), узоқ муддатли яшаш ва доимий яшаш. Охирги иккитаси, «Коммерсантъ»нинг таъкидлашича, ВЯР ва ЯУРни алмаштириши керак.