МРБ собиқ раҳбари Трампни АҚШ президенти сайлови учун энг катта таҳдид деб атади

Жон Бреннаннинг сўзларига кўра, Трамп ҳақиқатни бузиб кўрсатиши билан танилган ва «у шундай қилишда давом этади».

Фото: © AP

Амалдаги президент Дональд Трамп АҚШ президентлигига бўлажак сайловлар учун энг катта таҳдиддир. Бу ҳақда Марказий разведка бошқармаси (МРБ) собиқ директори Жон Бреннан Business Insider нашрига берган интервьюсида айтди.

«Айниқса, Дональд Трамп кампаниясининг ғирромлиги ва фактларни қасддан бузиб кўрсатишда давом этаётган тармоқлар мавжудлиги энг асосий хатардир», — деди МРБ собиқ раҳбари.

Бреннаннинг сўзларига кўра, Трамп ҳақиқатни бузиб кўрсатиши билан танилган ва «у шундай қилишда давом этади».

МРБ собиқ раҳбарининг айтишича, Россия Трамп президентлигидан «нимага умид қилган бўлса, барчасини олди».

«Қўшма Штатлар қанчалик заиф бўлса ва дунё кўз олдида шаънимиз қанчалик қора бўлса, охирги 75 йил давомида ўйнаган ролимизни ўйнашга лаёқатимиз шунчалик кам бўлади», — деди у.

Бреннан МРБда йигирма йилдан ортиқ ишлаган, 2013 йилдан 2017 йилгача бошқармага раҳбарлик қилган.