Сирдарёда тошқиндан жабрланганлар учун кўп қаватли уйлар қурилиши якунланмоқда

Сирдарё вилояти ҳокимлиги матбуот хизмати Kun.uz’га «Сардоба» сув омборидаги техноген вазият оқибатларини бартараф этиш чораларининг тезкор назорати хусусида маълумот тақдим этди.

Маҳалла ва оилани қўллаб-қувватлаш вазирлиги, Қурилиш вазирлиги ва бошқа дахлдор идоралар вакилларидан иборат 9та ишчи гуруҳи томонидан ўтказилган ўрганишлар давомида талафот кўрган 4710та хонадон (шундан 2211та яроқсиз ва 2499таси таъмирталаб) аниқланган.

Аҳолининг турар жойларини таъмирлаш бўйича
Талафот кўрган ҳудудларда аниқланган 1830та (Сардоба туманида 530, Оқолтин туманида 698 ва Мирзаобод туманида 602) хонадонда тиклаш ва таъмирлаш ишларини олиб бориш Қорақалпоғистон Республикаси, Тошкент шаҳри ва вилоятларга тақсимлаб берилган.

Ҳозирга қадар қурилиш-таъмирлаш ишлари бажарилган хонадонларнинг 1830тасига эгалари кўчирилди.

Кўп қаватли уй-жойларни таъмирлаш бўйича
Ишчи гуруҳлар томонидан ўтказилган ўрганишлар давомида жами 107та кўп қаватли уй (2 қаватли - 1320та хонадон) талафот кўрган. Шундан 63таси яроқсиз (Сардоба туманида 63 уй, 648 хонадон) ва 44таси таъмирталаблиги (Мирзаобод туманида 11та уй, 132та хонадон, Оқолтин туманида 20та уй, 360та хонадон, Сардоба туманида 13та уй, 180та хонадон) аниқланди.

2020 йил 1 октябрга қадар кўп қаватли уй-жойларни таъмирлаш ва туташ ҳудудларини ободонлаштириш ишларини якунлаш режалаштирилган бўлиб, ҳозирга қадар Сардоба тумани «Дўстлик» маҳалласидаги 648та хонадонли 63та кўп қаватли уйлар бузилди.

Янги кўп қаватли уйларнинг қурилиши бўйича
Сардоба ва Мирзаобод туманларида 2640 хонадондан иборат 66та кўп қаватли уй қурилиши режалаштирилган. 

Мирзаобод тумани «Ҳақиқат» МФЙда – 800 хонадондан иборат 40та (20та 2 подъездли ўрнига 40та 1 подъездли қурилмоқда) кўп қаватли уйни қуриш «WHITE CITY CONSTRUCTION» МЧЖ томонидан олиб борилиб, ишлар 63 фоизга бажарилган.

Ҳозирда МЧЖ томонидан 40та уйнинг қурилиш ишлари якунланиш арафасида.

Сардоба тумани «Дўстлик» МФЙда - 1480та хонадондан иборат 37та кўп қаватли уйни қуриш «GOLD STEP INVEST» МЧЖга топширилган бўлиб, ишлар 57 фоизга бажарилган.

Ҳозирга қадар МЧЖ томонидан 36та уйнинг асосий қисми якунланган.

Мирзаобод тумани «Навбаҳор» МФЙда – 360 хонадонли 9та кўп қаватли уйни қуриш «SILVER FLEX» МЧЖга топширилган бўлиб, ишнинг 78 фоизи амалга оширилган.

МЧЖ томонидан бугунги кунга қадар 7та уйнинг асосий қурилиш ишлари якунланган.

• Бундан олдинроқ бугунги кунга қадар тошқин вақтида эвакуация қилинганларнинг 80 мингдан ортиғи яшаш манзилларига қайтарилгани, 9386 киши эвакуация қилинган жойларида яшаётгани хабар қилинганди.