Францияда тарих ўқитувчиси ўлдирилди. Қотилликда чеченистонлик йигит гумонланмоқда

BFM TV телеканали тарқатган хабарга кўра, ўқитувчини ўлдиришда гумон қилинаётган йигитнинг исми Абдуллоҳ Анзоров. 2002 йилда туғилган чечен миллатига мансуб йигит ёшлигида оиласи билан Россиядан Францияга кўчиб келган.

Телеканалнинг маълум қилишича, гумондор аввал ҳам майда ҳуқуқбузарликлари туфайли полицияга таниш бўлган, лекин ҳуқуқни муҳофаза қилувчи органлар наздида радикал сифатида танилмаган.

Ҳозирда ўқитувчининг ўлдирилиши юзасидан 9 киши ушланган. Улар қаторида гумондор йигитнинг ота-онаси, бобоси ва акаси ҳам бор.

ОАВда қотилликда гумон қилинаётган шахс қурбон бўлган ўқитувчининг узилган бошини ўзининг «Твиттер» саҳифасида эълон қилгани ҳақида маълумотлар пайдо бўлди. Постда ўқитувчи Муҳаммад алайҳиссаломни таҳқирлагани учун ўлдирилгани айтилади. Ҳозирда ушбу аккаунт блок қилинган.

Қотиллик ўтган куни Париж яқинида содир бўлди. Воқеа жойига етиб келган полиция йигитга ўқ узган.

Франция ОАВнинг ёзишича, ўқитувчи аввалроқ ўзининг дарсларидан бирида сўз эркинлигининг намойиши сифатида Муҳаммад алайҳиссаломнинг карикатура қилинган расмини кўрсатган. Шундан сўнг унга таҳдидлар бошланган.

Франция президенти Эммануэл Макрон ушбу ҳолатни исломий террористик ҳаракат дея баҳолаган.