Франция ҳукумати RT France телеканали собиқ бош муҳаррири Ксения Фёдоровани мамлакатдан депортация қилиш тўғрисида қарор қабул қилди. Бу ҳақда Libération газетаси хабар берди.
Нашрнинг ёзишича, Париж полицияси префектураси Фёдорованинг адвокатига Ички ишлар вазирлиги томонидан имзоланган депортация ҳақидаги қарорни топширган.
Ҳужжатда қайд этилишича, Фёдорованинг хатти-ҳаракатлари Франция давлатининг асосий манфаатларига зарар етказади, унинг мамлакатда бўлиши эса жамоат тартиби учун «ўта жиддий ва долзарб таҳдид» ҳисобланади.
Қарорда, шунингдек, Ксения Фёдорова Россия ҳукумати томонидан бошқариладиган дезинформация кампанияларини тарқатишда иштирок этаётгани, бундай кампаниялар эса Францияда жамоат тартибини издан чиқаришга қаратилгани таъкидланган.
RT France телеканали Европа Иттифоқи санкциялари жорий этилганидан сўнг 2023 йил январ ойида ўз фаолиятини тўхтатган эди. Телеканал ёпилганидан кейин ҳам Фёдорова Францияда қолиб, француз тилида хотиралар китобини нашр этган.
2026 йил май ойида эса у Франциянинг ўнг-консерватив медиаҳолдингига ишга ўтгани маълум бўлган. Фёдорова халқаро мавзуларга бағишланган кўрсатувларда шарҳловчи сифатида қатнашиб, CNews телеканали, Europe 1 радиоси ва Le Journal du Dimanche газетасида ҳафталик муаллифлик рукнини юритиб келган. Ушбу ОАВлар француз миллиардери ва медиамагнати Венсан Боллорега тегишли.
Le Monde газетаси аввалроқ Фёдоровани Боллоренинг қўллаб-қувватловчиси сифатида таърифлаган. Шунингдек, унинг хотиралар китоби ҳам Боллорега қарашли Fayard нашриёти томонидан чоп этилган.
AFP агентлигининг маълум қилишича, Фёдорованинг иш берувчилари унинг депортация қилиниши ҳақидаги қарорни сўз эркинлигига қарши «жуда жиддий тажовуз» деб баҳолаган.
Франция президенти Эммануэл Макрон эса 2017 йилдаёқ Ксения Фёдоровани «пропагандачи ва Кремл таъсирининг воситаси» деб атаган эди. Жорий йил июн ойида унинг янги медиадаги фаолияти ҳақида сўралганида, Франция президенти бу борадаги позицияси ўзгармаганини яна бир бор таъкидлаган.
