Миграция агентлиги маълумотига кўра, ташкиллаштирилган тартибда хорижга ишга жойлаштириш географияси яна бир давлат — Франция ҳисобига кенгаймоқда.
Жорий йилнинг 12 июн куни Францияда мавсумий қишлоқ хўжалиги ишларида ишлаш учун номзодларни жалб қилиш бўйича эълон берилган. 1 июл куни эса талабгорлар француз иш берувчилари иштирокида онлайн суҳбатдан ўтган.
Пилот лойиҳа доирасида жами 10 нафар номзод француз иш берувчиси томонидан танлаб олинган.
Уларнинг дастлабки 6 нафари меҳнат визаларини олиб бўлган. Улар август ойида Францияга йўл олиб, меваларни йиғиш ва саралаш ишларида иш бошлаши режалаштирилган.
Лойиҳанинг кейинги босқичида қолган 4 нафар номзод куз ойларида Францияга юборилади. Улар сабзавот етиштириш ва ҳосилни йиғиш билан боғлиқ мавсумий ишларда меҳнат қилиши кўзда тутилган.
Миграция агентлигига кўра, бу Ўзбекистон фуқароларини Францияга ташкиллаштирилган тартибда ишга жойлаштириш бўйича илк йўналиш ва дастлабки пилот лойиҳа ҳисобланади.
Лойиҳа натижалари асосида келгусида Франциядаги иш берувчилар билан ҳамкорликни кенгайтириш ва ўзбекистонликлар учун ушбу мамлакат меҳнат бозорида янги иш имкониятларини яратиш режалаштирилган.
