Энергетика вазирлиги цемент заводларининг энергиядан ажратилганини инкор этди. Биржа савдоларида цемент нархи ошмоқда

Энергетика вазирлиги Ўзбекистонда цемент ишлаб чиқарувчи заводларга электр энергияси етказиб берилиши тўхтамаганини маълум қилди.

«Бу ёлғон маълумот бугун, 25 ноябр куни 19 мингдан зиёд обуначига эга бўлган телеграм каналларидан бирида жойлаштирилган. Мазкур телеграм канали эгаси у қандай аудиторияни қамраб олишга қодир эканини ҳисобга олган ҳолда ҳар қандай ёлғон маълумот тарқатиш ҳолати учун жавобгарликни ҳис қилиши лозим.  

Миш-мишни тасдиқловчи ёки инкор этувчи ваколатли манбаларга мурожаат қилмай туриб, «тармоқ маълумотларига асосланиб» деб ёзган ҳолда мазкур телеграм канали муаллифи цемент ишлаб чиқарувчи аниқ корхоналарни тилга олади ва уларга электр энергияси етказиб бериш тўхтатиб қўйилганини маълум қилади», — дейилади вазирлик хабарида.

Диспетчерлик маркази маълумотларига кўра, 24 ноябр куни Оҳангарон цемент заводига 605 минг кВт.соат электр энергияси етказиб берилган бўлиб, ўрта ҳисобда бу заводга кунига 540 минг кВт.соат электр энергияси етказиб берилади. Жумладан, Қувасой цемент заводи суткасига ўртача 332 минг кВт.соат электр энергияси истеъмол қилади.

Аввалроқ Bakiroo телеграм канали муаллифи ижтимоий тармоқда билдирилган маълумотга асосланиб, «цемент ишлаб чиқарувчи гигантлар «Оҳангаронцемент» ва «Қувасойцемент» ишлаб чиқариш қувватлари газ таъминотидан узилган»и ҳақида хабар берганди. Канал муаллифининг ёзишича, бу ҳолат гарчи мавсум бўлмаса-да, цемент нархларининг кескин кўтарилишига олиб келган.

Twitter’даги «Бобо» аккаунти эгаси 25 ноябр куни Оҳангарон цемент ва Қувасой цемент заводлари 2 ойлик муддатга газ таъминотидан узиб қўйилгани ҳақида хабар берган.

«Биржада 500-550 сўмга тушган цемент 2 кунда 50 сўмга ошди. Бу йил ҳам қурилишларнинг асоси (бўлган) цемент 1000 сўмдан ўтади, шекилли», — дея фикр билдирган тармоқ фойдаланувчиси.

Энергетика вазирлиги қонунчиликка мувофиқ, жисмоний шахс ёлғон хабар тарқатгани учун қонуний жавобгарликка тортилишини эслатган.

«Маълум бир аудиторияга мўлжалланган ҳар қандай хабар тарқатаётган киши бу борадаги масъулияти ва ҳар қандай исботини топмаган хабар, одамларга миш-мишлар ва текширилмаган маълумотларни етказгани учун жавобгарликка тортилиши мумкинлигини аниқ ҳис қилиши лозим», — дейилади вазирлик хабарида.

Товар хомашё биржа маълумотига кўра, шу йилнинг 20 ноябр куни «Оҳангаронцемент» АЖ томонидан биржа савдоларига қўйилган портландцементнинг (ПЦХ) 1 тоннаси ўртача 504 минг сўмдан сотилган. Шу куни «Қувасойцемент» АЖ томонидан савдога қўйилган М-400 цементининг 1 тоннаси ўртача 631 минг сўмга сотилган.

23 ноябр куни «Оҳангаронцемент» АЖ биржа савдоларида иштирок этмаган. Шунингдек, «Қувасойцемент» АЖ ҳам бозорда таклиф билдирмаган. 20 ноябрда 40 минг 394 тонна турли сифатдаги цемент биржа савдоларига қўйилган бўлса, уч кун ўтиб, ушбу кўрсаткич қарийб 9 минг тоннага камайган. 24 ноябр куни якунланган биржа савдоларида 1 тонна цементнинг ўртача нархи 520 сўмгача кўтарилган бўлиб, 4 кун ичида ўртача 20 сўмлик нарх ошиши кузатилди. «Оҳангаронцемент» АЖ ва «Қувасойцемент» АЖ биржа савдоларида 24 ноябрда ҳам иштирок этмаган.

Биржа вакилининг Kun.uz’га маълум қилишича, кейинги йил феврал ойига қадар цемент нархининг кескин кўтарилиши кузатилмайди.