«Лондон дербиси», Италияда пойтахт ва жануб қарама-қаршилиги, Испанияда «Атлетико» учун яна бир синов... Европа клублар футболи бу ҳафта ҳам мароқли дам олиш учун бир қатор қизиқарли учрашувларни тайёрлаб қўйган. Tribuna.uz ҳафтанинг марказий ва эътиборли учрашувлари анонсини келтиради.
«САССУОЛО» – «ИНТЕР» (28 ноябр, 19:00)
Ўтган йилнинг шу вақтида жуда ўринли ва муваффақиятли авлодлар алмашинуви ўтказаётгандек тасаввур уйғотган «Интер» бир йил ичида шу даражага етдики, Антонио Конте истеъфога яқинлашиб қолди. Айниқса, сўнгги пайтлар ўта муваффақиятсиз кечмоқда – миланликлар охирги учрашувнинг атиги иккитасида ғалаба қозондилар холос. Натижада жамоа бешинчи ўринга тушиб кетди, Чемпионлар Лигасида кейинги босқичга чиқиш имконияти ҳам энди Конте шогирдларига боғлиқ эмас.
Мана шундай паллада муҳим ғалаба қозониб, пешқадамлар сафига кириб олиш «Интер»га айни муддао бўларди, аммо рақиб бу сафар анойи эмас. «Сассуоло» бу мавсумда «Милан» ва «Ювентус» билан бирга мағлубият нималигини билмаётган уч жамоадан биридир. «Сассуоло» турнир жадвалида 2-поғонада бормоқда, урилган голлар сони бўйича энг яхши кўрсаткич уларда - «Аталанта»га салом! Хуллас, бу йилги А Серия яна бир кашфиёт жамоа тақдим этмоқда. «Сассуоло»нинг асосий ютуғи, сўнгги йиллардаги етакчилар, жумладан Бога, Берарди каби футболчиларни ўз сафида сақлаб қолганидир. Фақат бир жиҳатга алоҳида эътибор бериш керак. «Сассуоло» уйдан кўра сафарда самаралироқ тўп суряпти. Жамоа сафардаги тўрт учрашувнинг барчасини ғалаба билан якунлади, рақиблар ичида «Наполи» ҳам бор. Уйда эса тўрт ўйинда уч дуранг.
Ўзаро ўйинларга қарасак, айниқса, ўтган мавсумдаги тўқнашувлар чемпионатни безаб берганди. «Интер» сафарда 4:3 ҳисобида ютган бўлса, Миландаги ўйинда 3:3 ҳисоби қайд этилган. Умуман охирги 15 учрашувнинг 8тасида айнан «Сассуоло» ғалаба қозонгани, жамоа «Интер» учун ўта ноқулай рақиб эканини кўрсатади.
Ҳар икки томонда ҳам яқинда содир бўлган жароҳатлар деярли йўқ. Лекин «Интер» келаси ҳафтада менхенгладбахликлар билан ЕЧЛда ҳал қилувчи учрашувда майдонга тушиши, бу ўйинга бўлган муносабатга ҳам таъсир қилса керак.
«ВАЛЕНСИЯ» – «АТЛЕТИКО» (28 ноябр, 20:15)
Аста секинлик билан «Атлетико»нинг бу мавсум соврини учун энг асосий даъвогар эканини тан олаяпмиз. «Реал» ҳам, «Барселона» ҳам қаторасига бир неча муваффақиятли ўйин ўтказа олмаяптилар. Зидан шогирдларида жароҳатлар кўп, «Барселона» янги мураббий билан ҳам “чўлоқланиб” турибди. Бундай паллада ҳар доимгидек Симеоне вазиятдан фойдаланиши керак.
Чемпионлар Лигасидаги ўйинларни инобатга олмаса, «Атлетико» Испанияда айнан барқарорлик борасида энг намунали жамоа бўлиб турибди. Мадридликлар қаторасига беш ўйинни ғалаба билан якунладилар, умуман ҳали мағлубият нималигини билмаган ягона жамоа бўлиб турибди. Турнир жадвалида «Сосьедад» пешқадам бўлиб турган бўлса-да, «Атлетико» 2 ўйин кам ўтказган ва йўқотилган очколар бўйича яққол етакчидир. Ҳимоя чизиғи эса доимгидек – Облак 8 ўйинда атиги 2 маротаба ўз дарвозасидан тўп олиб чиқди, холос.
Мавзуга оид
«Валенсия» молиявий инқироз туфайли ёзда таркиб етакчиларидан айрилди. Жамоани «хавфли зона»дан атиги 4 очко ажратиб турибди, холос. Лекин бу ўйиннинг анонсга танланганида сабаблар кўп – биринчидан, барибир «Валенсия» бу «Валенсия», иккинчидан, жамоа пешқадамларга қарши дадил ва ишончли тўп суришини «Реал»га қарши ўйинда (4:1) ҳам кўрдик. «Валенсия» охирги 9 ўйиндан атиги 2 маротаба ғалаба қозонди, аммо бу ютуқлар «Реал» устидан йирик ҳисобда, шунингдек, пешқадам «Сосьедад» билан сафар ўйинида қўлга киритилди, Гайя, Солер, Васс, Паулиста, Ли Кан каби футболчилар бир жамоа учун юлдузлар лимитини тўлдира оладиган ва топ клубларнинг назаридаги ўйинчилардир. Учинчидан, «Валенсия» «Атлетико» билан ўзаро ўйинларда ҳам анча муносиб ҳаракат қилади. Охирги тўр ўйиндан учтасида томонлар муроса кўчасини танлашган. «Месталья»даги охирги – шу йилнинг февралида бўлиб ўтган учрашув 2:2 ҳисобида якунланганди.
«Атлетико» бу ўйинда қарши келиши мумкин бўлган яна бир муаммо ҳужум чизиғидаги ижрочилар Луис Суарес ва Диего Костанинг сафда йўқлигидир. Бу ҳолатда олдинги чизиқда осон бўлмаяпти, масалан «Локомотив»га қарши ЕЧЛ даги уй учрашувида рақиб дарвозаси ишғол қилинмади.
Бу жамоаларнинг охирги 18 ўйинида, яъни «Саутҳэмптон» АПЛ га қайтганидан буёғини оладиган бўлсак, атиги бир маротаба, 2016 йилнинг августида «МЮ» 2:0 ҳисобида устун келган. Қарангки, қолган барча ўйинларда ё дуранг, ё кимдир бир тўп фарқи билан ғалаба қозонган. Шу фактнинг ўзи ушбу учрашувнинг жуда муросасиз кечишини тахмин қилишимизга асос бўлади.
Шунингдек, «Саутҳэмптон» ҳозирда АПЛнинг энг ёрқин ва энг барқарор жамоаларидан бири – дастлабки 2 турда мағлубиятга учралганидан кейин қаторасига 7 учрашувдан бери мағлубият нималигини билмай келмоқда. Айниқса, Ральф шогирдлари рақиб майдонида фаол прессингни амалга ошириш бўйича лиганинг энг яхши жамоаси саналадилар. Ҳар қандай жамоа учун жуда ноқулай рақиб.
«Юнайтед» эса, зўр ва ўта ёмон ўйинларни навбати билан намойиш қилиб, барчани ҳайрон қолдиришда давом этяпти. «Вест Бромвич»га қарши ўйин ғалаба билан якунланган бўлса-да, кўпчиликнинг ҳафсаласини пир қилди, уч кун ўтиб эса, «Истамбул»га қарши анча савияли футбол намойиш қилинди. Айнан шу сафар нимани кутиш мумкинлигини олдиндан айтиш қийин. Бир нарса аниқки, ташаббускор ва фаол жамоаларга қарши Сульшер анча яхши ўйин қура олади. «Саутҳэмптон» ана шундай рақиблардан бири.
Таркиблар борасида икки фронтда курашаётган «Юнайтед»да муаммолар кўп. Аммо «Саутҳэмптон»нинг йўқотишлари анча жиддийроқ эканини айтиш мумкин. Дани Инггз ва Натан Редмонд айниқса, олдинги чизиқда катта хажмдаги ишларни амалга оширишарди. Меҳмонлардан, Сульшернинг айтишича, Погба ва Мактоминей жамоага ёрдам бера олмайди. Бу аслида фойда, зеро мураббийга энг тўғри таркибни ўйланиб ўтирмай танлаш имконини беради. Агар «Саутҳэмптон»нинг прессингни яхши кўришини инобатга олсак, бу борада Фред ва Ван Де Бек жуфтлиги анча фойдали бўлиши мумкин. Аарон ван Бисакка ва Линделёф ЕЧЛ ўйинида енгил жароҳат билан ўйинни эрта тарк этган бўлишса-да, Сульшернинг айтишича, ҳимоячилар якшанба оқшомида тайёр бўлишлари мумкин.
«ЧЕЛСИ» – «ТОТТЕНҲЭМ» (29 ноябр, 21:30)
«Челси» ва «Тоттенҳэм» сўнгги икки ойдаги Англиянинг энг кучли жамоалари деб бемалол айтиш мумкин. Натижалар ҳам бундан далолат қилмоқда. «Челси» барча мусобақаларда 13 ўйиндан бери мағлубият нималигини билмаяпти. Бу ўйинларнинг 8тасида гол ўтказилмаганини қайд этсак, ўтган йилги «Челси»дан асосий фарқ ўртага чиқади – Сильва ва Мендининг келиши ҳимоя чизиғини тартибга солди.
«Тоттенҳэм»да охирги 17 ўйинда атиги 1 мағлубият. У ҳам, унча аҳамиятли бўлмаган Европа лигаси доирасида иккинчи таркиб билан майдонга тушилганда содир бўлган. Бу сериянинг сабаби Моуриньо шогирдларининг ЕЧЛ эмас, ЕЛда қатнашаётганликлари ва АПЛ тақвими анча осон бўлганини айтиб келаётгандик, аммо ўтган турда «Манчестер Сити» устидан қозонилган ғалаба барчаси жиддийлигини кўрсатди. Демак, «Тоттенҳэм» ҳар қандай рақибни юта олади.
Англиянинг ушбу мавсумда энг яхши ҳужум («Челси») ва энг яхши ҳимоя («Тоттенҳэм») тўқнашувида қайсидир ижобий серияга барҳам берилади. Ёки сентябрдаги Англия лига кубоги баҳсидек дуранг билан ҳам тугаши мумкин. Ўшанда пенальтилар сериясида Лэмпард шогирдлари ғалаба қозонгандилар.
Жароҳатлар борасида мезбонларда муаммо йўқ. Фақат Билли Гилмур сафдан чиққанди, у ҳам машғулотларга қайтган. «Тоттенҳэм»да эса, Ламела ва Алдервейрелднинг жароҳат олганидан ташқари, Ло Чельсо, Стевен Бергвейн ва Уго Льорисда кичик муаммолар бор. Бу номларнинг баъзилари дербида ёрдам бера олмаслиги мумкин.
Хуллас, Моуриньо яна бир собиқ жамоаси майдонига ташриф буюрмоқда. Охиргиси яқинда «Олд Траффорд»да рўй бергани ва натижа қандай якунланганини эслатиш шарт эмас.
«НАПОЛИ» – «РОМА» (30 ноябрга ўтар кечаси, 00:45)
Айтиш мумкинки, «Рома» ва «Наполи» ушбу мавсумда Италиянинг энг ёрқин жамоалардандир. Бу клублар иштирокидаги ўйинлар жуда шиддатли ва голларга бой бўлмоқда. «Рома» 8 ўйиндан 17 очко жамғариб, пешқадам «Милан»дан 3 очко ортда қолган ҳолда 3-ўринни эгаллаб турибди. Бу ўйиндаги ғалаба римликларни ҳатто турнир жадвалида карвонбоши қилиши мумкин, «Наполи» ҳисобида эса шунча ўйиндан 14 очко бор. Пешқадамлардан узоқ масофада қолиб кетмаслик учун ҳам очко йўқотишга ҳаққи йўқ. Ғалаба «Наполи»ни «Рома»га етиб олишини таъминлайди. Диего Марадонани бутун дунё сўнгги манзилга кузатаётган ҳафтада «Наполи» унинг хотирасига муҳим ғалабани бағишламаслик, кечирилмайдиган ҳол бўлиши табиий.
«Рома»нинг барча мусобақалардаги мағлубиятсиз ўйинлар серияси 11 учрашувга етди. Қаторасига беш ўйин ғалаба билан якунланди. «Наполи»нинг формаси ҳам ёмон эмас, аммо шуни эътироф этиш керак – Гаттузо шогирдлари аутсайдерлар билан ўйинларда анча ишончли ва йўқотишларсиз бораётган бўлса-да, турнир жадвалида ўзидан юқорироқ ўриндаги рақибларга қарши муаммоларга учраяпти. Мавсумдаги икки мағлубият ҳам айнан пешқадамлар – «Милан» ва «Сассуоло»га қарши ўйинларда қабул қилинди. Яна бир турда «Ювентус»га техник ғалаба ёзилганидан хабарингиз бор.
Жамоаларнинг таркибидаги муаммоларига тўхталадиган бўлсак, мезбонлар таркибида Виктор Осимхен ва Алсаид Хюсайлар бир неча ҳафтага сафдан чиққан. Шунингдек, Бакойоко «Милан»га қарши ўйиннинг 65-дақиқасида майдондан четлатилди ва дисквалификация туфайли ушбу учрашувни ўтказиб юборади. Меҳмонлар таркибида эса асосий ҳимоячилар Давиде Сантон ва Крис Смоллинг жароҳатни даволаш билан банд. Николо Дзаньоло эса яна камида беш ой майдонга туша олмайди.
Ўзаро ўйинлар борасида мутлақ тенглик. Охирги учрашувнинг 9тасида «Рома», 9тасида «Наполи» ғалаба қозонган. Ўтган мавсумда ҳар икки ўйин ҳам мезбонларнинг 2:1 ҳисобидаги ғалабаси билан тугаган.
