Таҳририятга мурожаат қилган Матлуба Боева Қонунчилик палатаси девони мансабдор шахсларининг хатти-ҳаракатларидан норозилигини билдирди. Маълум бўлишича, у шу йилнинг 20 август куни онлайн аукционда Олий Мажлис Қонунчилик палатаси девони биносидаги ошхонани ижарага олиш ҳуқуқини қўлга киритади.
«Аукционда ютганимдан сўнг, Электрон онлайн аукционларни ташкил этиш марказидан ғолиблик баённомасини ва Бўш турган объектлардан самарали фойдаланишни ташкил этиш марказининг Тошкент шаҳар ҳудудий бошқармасидан уч томонлама шартномани олиб, имзолаш учун дарҳол Қонунчилик палатаси девонига бордим. Номаълум сабабларга кўра мен билан шартнома тузишни пайсалга солишди. «Бу ер «режимний» объект, кўчадан келган ҳар ким билан ишлайвермаймиз», деган жавоб олдим.
Белгиланган муддат ўтиб кетмасидан ижара шартномасини тузиш илинжида қайта-қайта бордим. Аммо уринишларим беҳуда кетди. Улар шартнома тузиш муддати ўтиб кетишига сунъий равишда эришишди. Қарабсизки, кейинги мурожаатларимга «муддат ўтиб кетган» деган жавобни олавердим», – дейди тадбиркорлик қилмоқчи бўлган аёл.
Дарҳақиқат, М.Боеванинг виртуал қабулхонага йўллаган мурожаатига Олий Мажлис Қонунчилик палатаси девони томонидан берилган жавобда кўрсатилган муддат давомида давлат мулки объектининг ижара шартномаси тузилмаганлиги сабабли аукцион баённомаси ўз кучини йўқотгани маълум қилинади.
Давлат активларини бошқариш агентлиги ҳузуридаги Бўш турган объектлардан самарали фойдаланишни ташкил этиш марказининг Тошкент шаҳар ҳудудий бошқармаси бўлим бошлиғи Бахтиёр Бегимқулов ушбу вазият бўйича қуйидагиларни маълум қилди:
«20 август куни «Nasiba rizq» MChJ Олий Мажлис Қонунчилик палатасининг маҳкамасида ошхона очиш бўйича аукционда ғолиб бўлган. Ижара шартномасини имзолаши учун тадбиркорга шартнома лойиҳасини чиқариб берганмиз. Тадбиркор ижара шартномасини тузиш учун шартномани Олий Мажлисга олиб бориб берган. Кўриб чиқамиз, деб олиб қолишган. Аммо баённомада шундай шарт борки, шартнома лойиҳаси берилгандан сўнг, 20 кун ичида шартнома имзоланмаса, баённома бекор бўлади. Шартнома имзолаш учун тадбиркор томонидан Олий Мажлисга олиб борилганида, у ерда имзоланмасдан ушлаб турилган ва шартнома имзолаш муддати ўтиб кетган».
У шартномани имзолаш масаласида тадбиркор томонидан бирор бир муддат бузилиши ёки камчилик ўтмаганини таъкидлади.
