Путин Байденни ғалаба билан табриклади

Телеграммада Путин сайланган президентга катта муваффақиятлар тилаган ҳамда глобал хавфсизлик ва барқарорлик учун алоҳида масъулиятни зиммасига олган Россия ва АҚШ ўзаро келишмовчиликларга қарамасдан, ҳозирда дунёда юзага келган кўплаб муаммолар ва чақириқларни ҳал қилишга ҳисса қўшишга қодирлигига ишонч билдирган.

Россияликлар етакчиси «ўзаро алоқалар ва ҳамкорлик»ка тайёр эканини қайд этган.

14 декабр куни сайловчилар ҳайъати кўпчилик овоз билан демократ Жо Байденни АҚШ президенти сайловларининг ғолиби дея тасдиқлади. Байденга 306 сайловчи, Трампга 232 сайловчи овоз берди. Ғалаба учун 270та овоз етарли эди. 2021 йилнинг 6 январида бу натижа Сенат ва Вакиллик палатасининг қўшма мажлисида тасдиқланади. 20 январ куни сайланган президентнинг инаугурация маросими ўтказилади.

АҚШнинг амалдаги президенти Дональд Трамп шу вақтгача мағлубиятини тан олмаган ва сайловларда оммавий сохталаштиришлар рўй берганини айтиб, судларга мурожаат қилган. Унинг ҳуқуқшунослари судларга ўнлаб турли даъволар билан мурожаат қилиб, овозларни қайта санаш ёки натижаларни бекор қилишни талаб қилди. Судлар улардан баъзиларинигина қондирди, аммо бу сайлов натижаларига аҳамиятли таъсир кўрсатмади.

Путин шошилмади

АҚШда президентлик сайловлари 3 ноябр куни ўтказилганди. 7 ноябр куни Америкадаги нуфузли нашрлар Жо Байденнинг ғалабаси ҳақида эълон қила бошлашди. Кўплаб дунё раҳбарлари ўша куниёқ Байденни сайловда ғалаба қозонгани муносабати билан табриклашганди, аммо Кремлдагилар расмий натижа эълон қилинмагунча табрик йўллашга шошилмади.

9 ноябрь куни  Россия президентининг матбуот котиби Дмитрий Песков журналистларга берган интервьюсида Владимир Путин овоз бериш натижалари расман эълон қилингандан сўнг АҚШнинг сайланган президентини сайловлардаги ғалабаси билан табриклашини маълум қилди.

«Путин АҚШнинг сайланган президентини ғалаба билан табриклаши ҳақидаги саволингизни олдиндан билган ҳолда, мен қуйидагиларни айтмоқчиман: биз сайлов натижаларининг расмий эълон қилинишини кутиш тўғри деб биламиз», деганди у.

Кремль вакили Путин тўрт йил аввал Путин якуний натижаларни кутмасдан Дональд Трампни ғалабаси билан табриклагани ҳақидаги саволга ҳам жавоб берганди: «Фарқи яққол кўриниб турибди. Ҳозирда амалдаги президент томонидан эълон қилинган муайян ҳуқуқий процедуралар бор. Шу сабабли расмий эълонни кутишни тўғри деб биламиз», деганди президент матбуот котиби.

14 ноябрь куни Песков Кремль АҚШнинг сайланган президентини расмий натижалар эълон қилинганидан сўнг табриклашини ваъда қилди. У Кремль АҚШдаги сайловдан кейин Байденнинг жамоаси билан алоқага чиқмаганини маълум қилганди.

26 ноябрь куни Песков яна бир марта Москва сайловнинг якуний расмий натижасини кутаётганини такрорлади. Путиннинг қарорига дунёнинг аксар давлатлари Байденни табриклаб бўлгани таъсир кўрсатиш-кўрсатмаслигига жавобан Песков шундай деганди: «Мутлақо йўқ».