Олий Мажлис Қонунчилик палатаси спикерининг биринчи ўринбосари Акмал Саидов Конституцияга тузатишлар киритиш тўғрисидаги қонун кенг жамоатчилик фикрисиз қандай қилиб палатадан ўтиб, Сенат ялпи мажлиси кун тартибига киритилгани ҳақидаги саволга жавоб берди.
Суд тизимидаги янгиликлардан келиб чиқиб, Конституцияга 15-марта тузатиш киритилиши қай йўсинда қилинаётгани танқидларга сабаб бўлган эди.
Акмал Саидов бу масалада Қонунчилик палатаси ҳаммасини тўғри бажарган, деб ҳисобламоқда. Бу ҳақда Kun.uz мухбири хабар беради.
«Мен Сенат учун эмас, фақатгина Қонунчилик палатаси учун жавоб бераман. «Қандай қилиб Қонунчилик палатасидан ўтиб кетди?» деган кесатиғингизга ҳам қўшилмайман. Биз Конституция бўйича ва киритилган қонунлар бўйича ишлаганмиз ҳамда буни охирига етказдик.
Биз Ўзбекистонда янги суд тизими бўйича барча керакли қонунларни қабул қилдик. Тўрт хил судни биттага бирлаштирдик. Шу ҳаммаси Конституциянинг 117-моддасига киритилиши керак. Бу 1 январдан ишлаши керак. Лекин Сенат...» – дея бошлаган гапини очиқ қолдирди у.
Маълумот учун, Сенат бу қонунни 18 декабрдаги ялпи мажлисида кўришни режалаштирган эди. Аммо бу қандай ўзгаришлар экани очиқланмагани, қонун матни эълон қилинмагани жамоатчиликда эътироз уйғотгач, Сенат ялпи мажлисидан бир кун олдин масала кун тартибидан ўчирилди.
Қонун лойиҳаси Қонунчилик палатаси расмий сайти ва норматив-ҳуқуқий ҳужжатлар лойиҳалари муҳокамаси порталига жойланмаган.
Қуйи палата спикерининг биринчи ўринбосари Акмал Саидов 23 декабрь кунги матбуот анжуманида сўзида давом этар экан, Конституцияга ўзгартириш киритиш тартибини белгиловчи 128-модда ҳақида тўхталди.
