Депутатлар “Ўзбекистон Республикаси Президенти Администрацияси тўғрисида”ги конституциявий қонун лойиҳасини биринчи ўқишда қабул қилди.
Ҳужжатда Президент Администрациясининг ҳуқуқий мақоми, асосий вазифалари, фаолиятини ташкил этиш тартиби ҳамда ваколатлари белгиланган.
Шунингдек, Администрациянинг мансабдор шахслари, бошқарув ва хизматчи ходимлари фаолиятининг кафолатлари белгилаб қўйилган.
Қонун лойиҳасида Администрациянинг давлат органлари ва ташкилотларининг комплаенс ва коррупцияга қарши ички назорат тузилмалари билан алоқалари ҳам очиб берилган.
Қонун лойиҳаси депутатлар томонидан биринчи ўқишда қабул қилинди.
Конституцияга тўлдириш
2023 йил 1 майдан эътиборан Ўзбекистон Конституциясининг янги таҳрири кучга кирган эди. 2026 йил 25 июл куни ушбу янги таҳрирдаги Конституция илк ўзгартиш ва қўшимчалар кучга кирди.
25 июлдан кучга кирган “Тошкент халқаро молия маркази тўғрисида”ги конституциявий қонун билан, Ўзбекистон конституциясининг бешта моддасига ўзгартиш ва қўшимчалар киритилди. Тўртта моддадаги ўзгаришлар Тошкент халқаро молия марказининг махсус ҳуқуқий мақомга эга бўлишини таъминлашга қаратилган бўлса, 109-моддадаги ўзгариш Президент Администрацияси билан боғлиқ.
Конституциянинг 109-моддасига қуйидагича қўшимчалар киритилди:
“Ўзбекистон Республикаси Президенти ўз ваколатларини амалга оширишни ташкилий, ҳуқуқий, таҳлилий жиҳатдан таъминлаш мақсадида Ўзбекистон Республикаси Президенти Администрациясини шакллантиради ҳамда унинг Раҳбарини тайинлайди.
Ўзбекистон Республикаси Президенти Администрациясининг ҳуқуқий мақоми, асосий вазифалари, фаолиятини ташкил этиш тартиби ва ваколатлари қонун билан белгиланади”.
