Ўзбекистон паспорти дунё рейтингида 86-ўринни эгаллади

Henley & Partners томонидан тузилган рўйхатда Ўзбекистон уч поғонага пасайиб, 86-ўринни эгаллади. Рейтингга кўра, Ўзбекистон фуқаролари 57 мамлакатга визасиз киришлари ёки етиб боргандан кейин виза олишлари мумкин.

Ўзбекистон Кот-д'Ивуар ва Габон билан 86-ўринни бўлишиб олди.

Япония рейтингда биринчи ўринда турибди. Япония фуқароларига 191та давлатга визасиз кириш ёки боргандан кейин виза олиш ҳуқуқи берилган. Иккинчи ўринда 190 мамлакат билан Сингапур, учинчи ўринда Жанубий Корея ва Германия жойлашган. Уларнинг фуқаролари 189 мамлакатга визасиз киришлари ёки боргандан кейин виза олишлари мумкин.

Тўртинчи поғонада Финляндия, Италия, Люксембург ва Испания (188 давлат) бўлса, бешинчи ўринда - Австрия ва Дания (187 давлат). Франция, Ирландия, Нидерландия, Португалия, Швеция 6-поғонада (186 давлат), Бельгия, Янги Зеландия, Норвегия, Швейцария, Буюк Британия ва АҚШ 7-ўринда (185 давлат). Саккизинчи поғонадан Австралия, Чехия, Греция, Мальта (184 давлат), тўққизинчи ўриндан Канада (183 давлат) ва 10-поғонадан Венгрия (182 давлат) жой олди.

МДҲ мамлакатларидан Россия 50-ўринда (116 давлат), Беларус ва Қозоғистон 70-ўринда (75 давлат), Озарбойжон 76-ўринда (67), Арманистон 80-ўринда (63), Тожикистон 85-ўринда (58) ва Туркманистон 90-ўринда (53 давлат).

Рейтингнинг сўнгги қаторидан Афғонистон жой олган. Мазкур давлат фуқаролари учун 26та мамлакатга визасиз кириш имкони мавжуд.