Индонезиядаги авиаҳалокат: қурбонлар жасадлари топилди

Жакарта ҳуқуқ-тартибот бошқармаси вакили Умар Шаҳобнинг маълум қилишича, жасадлар қирғоққа етказилган ва ўликхонага ДНК бўйича шахсларни ўрнатиш учун жўнатилган.

Шунингдек, денгизда самолётга тегишли бўлиши мумкин бўлган баъзи бўлаклар топилган. 

Таъкидланишича, самолёт қулаган эҳтимолий ҳудудга Индонезия ҳарбий-денгиз кучларининг 10та кемаси ва 40га яқин ғаввос жўнатилган. Улар ҳудудни кўздан кечириб чиқишади.  

9 январда Индонезиянинг Sriwijaya Air авиакомпаниясининг Boeing 737-500 самолёти Жакартадан ҳавога кўтарилгач кўп ўтмай баландликни йўқотган ва Лаки ороли яқинида Яван денгизига қулаган. Самолётда 65 киши, жумладан экипажнинг 12 аъзоси бўлган. 

Қутқарувчиларнинг таъкидлашича, номаълум сабабларга кўра самолёт фалокат сигналларини бермаган.

2018 йил октябрда ҳам Индонезиянинг Lion Air авиакомпанияси самолёти иштирокида авиаҳалокат юз берганди. Ўшанда Жакартадан ҳавога кўтарилган  Boeing 737 Max 8 самолёти парвознинг 11-дақиқасида Ява денгизига қулаган. Кейинроқ маълум бўлишича, 189 кишининг ўлимига олиб келган авиаҳалокатга самолётдаги муаммолар сабаб бўлган.