Андрей Кубатинга оид суд иши: марҳум яқинларининг маънавий зарар ундириш тўғрисидаги даъвоси рад этилди

Судда қатнашган Kun.uz мухбирининг хабар беришича, мажлисга жавобгар сифатида чақирилган Тошкент шаҳар Молия бошқармаси ва даъвогар яшаш жойи бўйича чақирилган қўшимча жавобгар - Бектемир тумани Молия бошқармаси вакиллари келмаган.

Суд иши марҳум Андрей Кубатиннинг опаси, даъвогар Клара Сахарованинг розилиги билан жавобгар тарафлар иштирокисиз кўриб чиқилди.

Суд ишида музокарага ўтилди ва даъвогарнинг музокара нутқи тингланди.

Судья қарор қабул қилиш учун алоҳида хонага кириб чиққанидан сўнг, иш бўйича ҳал қилув қарорини эълон қилди.

Унга кўра, Клара Сахарованинг даъво талаблари қаноатлантиришдан рад этилди. Шунингдек, судья процесс иштирокчиларига нима сабабдан бундай қарорга келгани ҳақида изоҳ бериб ўтди. 

Даъвогарга суд қарори устидан белгиланган тартибда шу суд орқали апелляция шикояти киритиш ҳуқуқи борлиги тушунтирилди.

Эслатиб ўтамиз, шу йилнинг 25 январ куни бўлиб ўтган биринчи суд мажлисида марҳум Андрей Кубатиннинг опаси жавобгар Тошкент шаҳар Молия бошқармасидан етказилган маънавий зарар учун 3,5 миллиард сўм маблағ ундиришни сўраган эди.

Жавобгар - Тошкент шаҳар Молия бошқармаси вакили эса, ушбу сумма давлат бюджети ҳисобидан эмас, балки марҳумга маънавий зарар етишига сабаб бўлган органлар, уни тергов қилган ташкилотлар, прокуратура ва айблов ҳукмини чиқарган суд томонидан қопланиши кераклигини айтган.

Шунингдек, Клара Сахарова 2020 йилда Ўзбекистон ҳарбий судига ҳам 560 млн сўм миқдорида моддий зарарни қоплаш тўғрисида ариза билан мурожаат қилган. Суд унинг даъвосини қисман қаноатлантириб, 478 минг сўм ундириш тўғрисида қарор чиқарган.

Эслатиб ўтамиз, Тошкент давлат шарқшунослик институтининг катта ўқитувчиси бўлиб ишлаган турколог олим Андрей Кубатин 2017 йили Жиноят кодексининг 157-моддаси (Давлатга хоинлик қилиш)да назарда тутилган жиноятни содир этишда айбланиб, ҳибсга олинган эди.

“Чет эл олимига ноёб китобларнинг сканер қилинган нусхаларини топширгани” ҳақидаги айблов хулосаси билан олимга нисбатан ўша йили 11 йилга озодликдан маҳрум қилиш жазоси тайинланди, апелляциядан сўнг бу муддат 5 йилга туширилди.

Бу орада Халқаро инсон ҳуқуқлари ташкилотлари ва Кубатинни таниган дунёдаги йирик бошқа олимлар бу иш уюштирилганини айтиб, президент Шавкат Мирзиёевга мурожаат қилди.

2019 йил 26 сентябр куни эса жиноят ишлари бўйича Тошкент вилояти судида Андрей Кубатиннинг иши қайта кўриб чиқилган ва олим тўлиқ оқланиб, суд залидан озод этилганди.

2,5 йиллик қамоқдан сўнг Кубатин 2019 йил декабрдан буён Ўзбекистон Фанлар академияси Миллий археология марказида фаолият юритиб келди.

Андрей Кубатин ва унинг турмуш ўртоғи, олима Феруза Жуманиёзова Kun.uz'га интервью бериб, суҳбат давомида ҳаётларининг оммага маълум бўлмаган қирралари, илм ва олим тийнати, тарихчи олимни қийнаган муаммолар, шунингдек, илмий фаолиятлари ҳақида сўзлаб беришган эди.

2020 йил 29 октябр куни турколог олим Андрей Кубатин коронавирусдан хасталаниб, шифохонада вафот этди.

Фаррух Абсаттаров, Kun.uz
Тасвирчи – Мирвоҳид Мирраҳимов.