Қишлоқ хўжалиги соҳасига қизиқувчи ва инновацион лойиҳага эга ёшлар бу лойиҳаларини амалга ошириш учун Metsenat.uz доирасидаги танловда иштирок этиши мумкин.
Инновацион ривожланиш вазирлиги ҳузуридаги Ёшлар академияси томонидан қишлоқ хўжалиги соҳасида стартап ва инновацион лойиҳаларга эга бўлган ёшларнинг ташаббусларини қўллаб-қўвватлаш ва шу орқали ёшларнинг бандлигини таъминлаш мақсадида «Қишлоқ хўжалигида ёшларнинг инновацион лойиҳалари» танлови эълон қилинди.
Ушбу грантнинг мақсади: қишлоқ хўжалиги соҳасига қизиқувчи ва президент ташаббуси билан ажратилган ер майдонига эга ёшларни қўллаб-қувватлаш, уларнинг инновацион стартап ва лойиҳаларини молиялаштириш ҳамда ҳозирда давлат сиёсатининг устувор йўналишларидан бири ҳисобланмиш ёшлар бандлигини таъминлаш масаласини ҳал этиш.
Ушбу танловда қатнашиш шартлари қандай?
Биринчидан, иштитирокчилар 40 ёшдан ошмаган бўлишлари, иккинчидан, имтиёзли шартларда ер майдонига эга бўлишлари лозим. Ва энг сўнггиси, ўз лойиҳалари ёки стартапларини тақдим қилишлари талаб этилади.
Танловга лойиҳалар қуйидаги йўналишлар бўйича қабул қилинади:
- Сув тежовчи технологияларни қишлоқ хўжалигида ишлатиш;
- Қишлоқ хўжалиги маҳсулотларини сақлаш ва қайта ишлаш бўйича инновацион ечимлар;
- Самарадорлиги юқори бўлган ўғитли маҳсулотлардан фойдаланиш;
- Иссиқхона фаолиятини ташкил этишнинг инновацион усуллари;
- Боғдорчилик, полизчилик йўналишидаги сўнгги технологиялар;
- Янги авлод кўчатларни етиштириш, кўпайтириш ва экиш;
- Қишлоқ хўжалигига оид бошқа йўналишлар.
Танловда иштирок этиш учун қандай ҳужжатлар тақдим этилиши лозим?
- Шахсни тасдиқловчи ҳужжат;
- Жамоаси тўғрисида маълумот (агар мавжуд бўлса);
- Ер майдони ажратилганини тасдиқловчи ҳужжат;
- Патент ёки сертификат (агар мавжуд бўлса);
- Лойиҳа ҳақида тақдимот (10та слайддан ошмаслиги керак).
Тақдимотда лойиҳанинг мақсади, амалга ошириш усуллари, молиявий ва техник кўрсаткичлари, ажратилган пул маблағи мазкур лойиҳа доирасида қандай инновацион ечим учун сарфланишини асослаш ҳамда кутилаётган натижа кўрсатилиши лозим.
Лойиҳаларнинг республиканинг 13та ҳудуди (Тошкент шаҳридан ташқари) кесимида бўлишига алоҳида эътибор қаратилади ва рағбатлантирилади.
Ҳужжатлар Metsenat.uz сайти орқали қабул қилинади.
Танлов бўйича лойиҳалар жорий йилнинг 8 март санасига қадар қабул қилинади.
Танлов доирасида ҳар бир лойиҳа учун 50 млн сўмгача пул маблағлари ажратилади. Келиб тушган лойиҳалар ҳар ҳафта экспертлар томонидан баҳоланади ва энг яхши 25таси танлаб олинади. Танлов якуни бўйича эса жами энг яхши 100та лойиҳа танлаб олинади.
Маълумот ўрнида: Kun.uz нашри Metsenat.uz лойиҳасининг расмий ахборот ҳамкори ҳисобланади ва сайтда эълон қилинаётган барча грант ҳамда стипендияларни тарғиб қилишга кўмаклашади. Шу ўринда юртимиздаги барча корхона, ташкилот, компаниялар ҳамда саховатпеша тадбиркорларни илм-фанга, таълимга беминнат ҳомийлик қилишга чорлаб қоламиз.
