Мактабда боласини урган асакалик ўқитувчи аёл ишда қолди, мактаб директори ишдан олинди

Kun.uz мухбири Абдували Қурбонов билан суҳбатда ўз фарзандини урган ўқитувчи Мадина Умаралиева мактаб мутасаддилари ушбу видеони атай тарқатган бўлиши мумкинлиги ҳақида таъкидлаган эди.

Kun.uz’га маълум бўлишича, 23 март куни шу масала юзасидан 49-мактабда кенг жамоатчилик иштирокида мажлис ўтказилган. Мажлисда вилоят халқ таълими бошқармаси бошлиғи Азизбек Миркомилов иштирок этган. Мажлисда 49-мактаб директори Умиджон Мирзахолиқов эгаллаб турган лавозимидан озод этилган.

Бундан ташқари, фарзандини калтаклаган аёлнинг II гуруҳ ногиронлиги бўлган икки нафар ўғлига логопед-тарбиячи бириктирилган. Шунингдек, вилоят халқ таълими бошқармаси бошлиғи калтакланган фарзандни Асака туманидаги 25-сонли мактаб-интернатга жойлаштириш бўйича кўрсатма берган.

Мажлисда иштирок этган Мадина Умаралиева унга шароитидан келиб чиқиб ҳар уч ойда бир марта моддий ёрдам кўрсатилиши белгиланганини ҳам таъкидлади.

Ҳозирда Мадина Умаралиева 49-мактабда ўз вазифасида меҳнат фаолиятини давом эттирмоқда.

Эслатиб ўтамиз, 49-мактаб директори Kun.uz’га берган интервьюсида видео тарқалишига бошқа бир тўгарак раҳбарини сабабчи қилиб кўрсатган эди.

Собиқ директорга кўра, М.Умаралиева бундан аввалроқ, 4-синф ўқувчисига танбеҳ берган ва боланинг ота-онаси М.Умаралиеванинг устидан мактабга шикоят билан келган. Ота-она видеокамералардаги ёзувни кўрсатишни сўрашган ва улар М.Умаралиева фарзандини ураётгандаги ҳолатни ўзларига кўчириб олишган ва тарқалиб кетишига сабабчи бўлишган. Директор бу ҳолатдан мутлақо бехабар бўлганини айтганди.