Январ-март ойларида Тошкентда солиқ органлари мансабдорларининг хатти-ҳаракатларини ғайриқонуний деб топиш бўйича 15 та ариза судда қаноатлантирилган, 13 та ариза рад этилган.
Тошкент шаҳар маъмурий суди раиси Улуғбек Алмамедов 1-чорак якунларига бағишлаб 4 май куни ўтказилган брифингда давлат мансабдорларининг хатти-ҳаракатларини ғайриқонуний деб топиш юзасидан кўрилган ишлар ҳақида маълумот берди.
Маълум қилинишича, 2021 йилнинг 3 ойи давомида маъмурий органлар мансабдор шахсларининг хатти-ҳаракатларини ғайриқонуний деб топиш билан боғлиқ ишлар сони тузилмалар кесимида қуйидагича кўриниш олган:
- Бюджетдан ташқари пенсия жамғармаси мансабдор шахсларининг хатти-ҳаракатларини ғайриқонуний деб топиш, уларнинг қарорларини ҳақиқий эмас деб топиш юзасидан 176 та иш кўрилган. Шундан, 161 таси қаноатлантирилган, 6 таси рад қилинган, 6 таси кўрмасдан қолдирилган, 3 таси иш юритишдан тугатилган;
- маҳаллий ҳокимликлар мансабдор шахсларининг хатти-ҳаракатларини ғайриқонуний деб топиш ва ҳоким қарорларини ҳақиқий эмас деб топиш юзасидан 106 та иш кўрилган. Шундан, 37 таси қаноатлантирилган, 46 таси рад қилинган, 13 таси кўрмасдан қолдирилган, 10 таси иш юритишдан тугатилган (Ер участкаларини олиб қўйиш, компенсация);
- давлат солиқ органлари мансабдор шахсларининг хатти-ҳаракатларини ғайриқонуний деб топиш, уларнинг қарорларини ҳақиқий эмас деб топиш юзасидан 46 та иш кўрилган. Шундан, 15 таси қаноатлантирилган, 13 таси рад қилинган, 18 таси иш юритишдан тугатилган;
- адлия органлари (нотариус, ФҲДЁ, Давлат хизматлари агентлиги ва б.) мансабдор шахсларининг хатти-ҳаракатларини ғайриқонуний деб топиш, уларнинг қарорларини ҳақиқий эмас деб топиш юзасидан 11 та иш кўрилган. Шундан, 7 таси қаноатлантирилган, 3 таси рад қилинган, 1 таси кўрмасдан қолдирилган.
Улуғбек Алмамедовнинг қайд этишича, давлат солиқ органлари билан боғлиқ ишларнинг аксариятини ҚҚС қўллаш бўйича қарорлар устидан берилган шикоятлар ташкил этади.
