ЖССТ коронавирус келиб чиқишини аниқлаш бўйича терговнинг иккинчи босқичига ўтади

«Катта еттилик» давлатлари Британияда ўтаётган саммитда коронавирус келиб чиқиши масаласини муҳокама қилишди. Унда иштирок этган ЖССТ раҳбари Тедрос Аданом Гебрейесус коронавирус келиб чиқишини аниқлаш муҳимлигини айтди ва бу бўйича терговнинг иккинчи босқичига ўтилишини маълум қилди.

«Биз коронавирус пайдо бўлишини муҳокама қилдик. Фикримизча, бу борада барча версиялар муҳокама қилиниши керак ва биз вируснинг келиб чиқишини батамом аниқлаш учун терговнинг иккинчи босқичига ўтишимиз лозим», деб айтган Гебрейесус.

У коронавирус лабораториядан чиқиб кетган бўлишини истисно қилмаслигини айтган.

«Хитой томонидан терговнинг бошланғич босқичида етарлича очиқ-ойдинлик ва ҳамкорлик бўлмади», деб қўшимча қилган ЖССТ раҳбари.

Гебрейесус 3,75 млн киши пандемия қурбони бўлганини ва «бу одамларга ҳурмат юзасидан ва келгусида бошқа бундай пандемияга йўл қўймаслик учун вируснинг келиб чиқишини аниқлаш зарурлигини» айтган.

Вируснинг келиб чиқиши борасидаги баҳс ҳамон давом этмоқда. Ғарб давлатлари, хусусан, АҚШ бунда Хитойни айблаяпти. Хитой эса пандемияга жавобгар эмаслигини айтиб, ўзига билдирилаётган барча айбловларни рад этиб келмоқда.

Март ойида ЖССТ ўз мутахассисларининг коронавирус илк бор қайд этилган Хитойнинг Уҳан шаҳрига сафаридан кейин вирус келиб чиқиш манбайини аниқлашнинг имкони бўлмагани маълум қилган. ЖССТ экспертлари вирус лабораториядан чиқиб кетган бўлиши мумкинлиги эҳтимоли озлигини айтишганди.

Бироқ май ва июнда АҚШ ОАВда коронавирус Уҳандаги лабораториядан чиқиб кетганига ишора қилувчи материаллар пайдо бўла бошлади. Жумладан, The Wall Street Journal нашри вирус қўзғатувчиси табиий йўл билан пайдо бўлган коронавирусда ҳеч қачон кузатилмаган генетик изга эгалигини маълум қилди. АҚШ президенти Жо Байден разведкадан коронавирус келиб чиқишини аниқлаш бўйича ишларни кучайтиришни талаб қилган.