Азиз Абдуҳакимов Туркий кенгашда Маданий мерос объектларини асраш жамғармасини тузишни таклиф қилди

Йиғилишда сўзга чиққан Ўзбекистон бош вазири ўринбосари, туризм ва спорт вазири Азиз Абдуҳакимов қатор таклифларни илгари сурди.

“Туркий халқлар одатига кўра – қариндошлик алоқаларини ушлаб туриш учун тез-тез меҳмон бўлиш, бир бирини йўқлаб бориш анъанаси ота-боболаримиздан қолган.

Биз, бугун қардошлик алоқаларини мустаҳкамлаш ва бир-биримизнинг уйимизда меҳмон бўлиш учун мавжуд саволларга жавоб топишимиз лозим.

Рухсатингиз билан қуйидаги таклифларимни билдириб ўтсам.

Биринчидан, Кенгашга аъзо ва кузатувчи давлатлар ўртасида транспорт логистика тизимини ривожлантириш долзарб масала ва бу умумий манфаатларимизга тўлиқ мос келади.

Бунинг учун, шаҳарлар ўртасида мунтазам ва чартер парвозлар ташкил қилиш, туристик поезд, автобуслар қатновини йўлга қўйиш ва сайёҳларнинг ўз автомобилида ҳаракатланишига имконият яратишимиз лозим.

Иккинчидан, давлатларимиз туризм салоҳиятини тарғиб қилиш ишларига янгича ёндашишимиз зарур.

Пойтахт ва туризм шаҳарлардаги аэропорт ва вокзалларда туризм маълумот марказларини ташкил қилган ҳолда тарғибот материалларини 24/7 режимида жойлаштиришни таклиф қиламан.

Бундан ташқари, маҳаллий телеканалларда туркий халқлар ва меҳмондўстлик тўғрисидаги кўрсатувларни доимий равишда эфирга бериб боришимиз керак.

Ўзбекистон томони “Туризм 365”, “ UzReport” ва “Тарих”, “Ал-Бухорий” халқаро йўлдош телеканалида Сиз томонингизда тақдим этиладиган дастурларни жойлаштиришга тайёрлигимизни маълум қиламиз.

Учинчидан, ҳозирги кунда долзарб бўлган масала – маданий мерос объектларимизни тиклаш, реставрация қилиш, қадимий архитектурасини йўқотмаган ҳолда сақлаб қолиш, рақамлаштириш, самарали менежментни жорий қилиш ва келажак авлодга етказишдир.

Шу мақсадда, Туркий кенгаш ҳузурида аъзо давлатларнинг маблағи асосида Маданий мерос объектларини асраш жамғармасини ташкил қилишни таклиф этаман.

Жамғарма маблағлари биринчи навбатда Кенгаш аъзолари бўйича тўлиқ маданий мерос объектлари онлайн харитаси – платформаси ва рақамлаштирилган нусхаларини яратишга, туркий давлатларнинг маданияти, тарихи, моддий ва номоддий меъроси бўйича амалга ошириладиган илмий-амалий изланишларга йўналтирилиши лозим.

Тўртинчидан, туркий давлатларнинг ягона маданий ва туризм тадбирлари тақвимини яратиш таклифини билдирмоқчиман.

Унга кўра, халқ ўйинлари – этно спорт (улоқ-кўпкари, дорбозлик, кураш, камондан ўқ узиш, тош кўтариш каби) ва бахшилар мусобақасини ўтказиб бориш тарихий анъаналаримизнинг йўқолиб кетишининг олдини олади.

Бобурийлар сулоласи бошланган қадимги Ахсикент қалъаси ҳудудида “Туркий овоз” қўшиқ ва куй фестивалини ташкил этишни таклиф этаман.

Бешинчидан, туроператорларнинг туризм бозорларига кириб боришини қўллаб-қувватлашимиз ва улар ёрдамида қўшма турлар ташкил қилишимиз барчамиз учун манфаатлидир.

Олтинчидан, туризм таълими соҳасида тажриба алмашиш ва соҳадаги мутахассисларнинг доимий малакасини ошириш, академик туризмни йўлга қўйиш зарур. Бунда, мамлакатларимиз олий ўқув юртлари ўртасида грант квоталарини жорий қилиш ва кўпайтириш лозим.

Чунки айнан ёшларимизнинг бир-бирлари билан алоқаларини кучайтирсак, уларнинг халқларимиз тарихи, мероси ва ҳозирги хаётига ўзаро қизиқишларини орттирсак, шундагина ҳамкорлигимиз келажаги учун мустаҳкам пойдевор қурган бўламиз.

Еттинчидан, Туркий кенгаш томонидан таклиф қилинган “Туризм пойтахти” ташаббусини қўллаб-қувватлашимизни маълум қилган ҳолда, унинг воситасида ҳозирда машҳур туризм масканларини эмас, балки сайёҳлик потенциали юқори бўлган шаҳарларни ривожлантиришимиз лозим.

Ўзбекистон томони Туркий дунё ва халқларининг ривожланишида ўзининг алоҳида ўрнига эга, Ипак йўли равнақига муҳим ҳисса қўшган Қўқон шаҳри номзодини илгари суради ва сиздан мазкур шаҳарни Туркий кенгашнинг илк туризм пойтахти сифатида қўллаб-қувватлашингизни сўраб қоламиз.

Ўз навбатида, ишонтириб айтаманки ушбу ташаббус доирасида шаҳарларимиз ўртасидаги туризм алоқаларни ҳар томонлама кучайтиришга қаратилган амалий чора-тадбирлар чиқилади ва муваффақиятли амалга оширилади”, – деди Азиз Абдуҳакимов.

Йиғилишда Қўқон шаҳрини Туркий кенгашнинг илк туризм пойтахти деб эълон қилиш ҳақидаги таклиф маъқулланди.