Лионель Месси «Пари Сен-Жермен» аъзосига айланди. Томонлар кейинроқ узайтириш шарти билан икки йиллик шартнома тузди. Мессининг янги клубидаги маоши ошкор қилинмаган, лекин ОАВ маълумотига кўра, у йилига 35 миллион евро олиши мумкин.
Ҳужумчи Лионель Месси эркин агент сифатида «ПСЖ»га ўтди. Бу ҳақда француз клуби расмий сайти эълон қилди.
Аргентиналик 34 ёшли футболчи билан 2023 йилгача мўлжалланган шартнома имзоланди. Шунингдек, битимда уни яна бир йилга узайтириш борасидаги банд ҳам бор.
Ҳужумчи Париж клубида 30-рақамда ўйнайди. У «Барселона»даги фаолиятининг бошида ҳам айнан шу рақамда ҳаракат қилган.
ОАВнинг ёзишича, Мессининг йиллик маоши 35 млн еврони ташкил этади.
«ПСЖ»да фаолиятимдаги янги даврни бошлаётганимдан хурсандман. Клубдаги барча нарса менинг истакларимга мос келади. Бу ерда иқтидорли жамоа ва мураббийлар штаби борлигини биламан.
Клуб ва мухлислар ўзгача ҳиссиётларга эга бўлишларига ёрдамлашмоқчиман. «Парк де Пренс» майдонига чиқишни сабрсизлик билан кутяпман», — дейди ҳужумчи шартнома имзолагач.
