“Бўка туманидаги стадион тиканзор бўлиб, у ерда чорва моллари боқиляпти” — Сенатда аҳолини спортга жалб қилишдаги муаммолар саналди

Маълум қилинишича, яратилган шароитлар натижасида Ўзбекистонда спорт билан доимий шуғулланувчи аҳоли сони 2020 йилдаги 19 фоиздан 2021 йилда 21,3 фоизга етказилган. Шунингдек, сенатор Тошкент ҳамда Наманган вилоятларида ўтказган ўрганишлар натижасида бир қанча салбий ҳолатларга гувоҳ бўлганини билдирди.

"Ҳудудларда “Workout” (маҳалла ва кўча фитнеси) – махсус спорт майдончаларидаги янги жиҳозлар қаровсизлиги сабабли фойдаланишга яроқсиз аҳволга келиб қолган.

Хусусан, Тошкент вилоятидаги Бўка тумани «Кўкорол» қишлоқ фуқаролар йиғини ҳудудидаги 3 гектарлик футбол стадиони тиканзор бўлиб, ҳувуллаб ётибди, у ерда чорва моллари боқиляпти. Зангиота тумани Рамадан маҳалласидаги стадион ҳам қаровсиз аҳволда. Шу ҳудуддаги “Workout” майдончасидаги жиҳозлар синдириб ташланган.

Шунингдек, президент фармонида 2021 йил 1 майга қадар ҳар бир туман маркази ва шаҳарларда пиёда ва велосипедда юриш учун «Саломатлик йўлаклари»ни бунёд этиш белгиланган бўлса-да, айрим ҳудудларда ушбу топшириқ ижроси бажарилмаган.

Хусусан, Навоий вилоятида 199та, Тошкент вилоятида 98та, Хоразм вилоятида 48та, Сурхондарё вилоятидаги 40та маҳаллада велоспорт, юриш, югуриш йўлаклари мавжуд эмас. Айрим ҳудудлардаги мутасаддилар томонидан «Саломатлик йўлаклари» сифатида тақдим этилаётган пиёдалар йўлаклари белгиланган ўлчамлар ва талабларга жавоб бермайди.

Шунингдек, Тошкент вилоятида 477та, Сурхондарё вилоятида 235та, Хоразм вилоятида 124та, Андижон вилоятида 50та маҳаллада “Workout” майдончалари ташкил қилинмаган. Хоразм вилоятида 171та, Навоий вилоятида 131та, Андижон вилоятида 71та, Тошкент шаҳрида 47та маҳаллада мини-футбол майдонлари йўқ”, — дейди сенатор Бахтиёр Сайфуллаев.

Бундан ташқари, инвестиция дастурларига киритилган спорт иншоотларида олиб борилган қурилиш-таъмирлаш ишлари сифатсиз бажарилгани туфайли мазкур иншоотлар қабул қилиб олингандан сўнг фойдаланишга яроқсиз аҳволда қолаётгани билдирилди.

Сенаторлар юқоридаги муаммоларга ҳукумат эътиборини қаратиш кераклигини билдирди ва уларни ҳал этиш мақсадида Сенат қарори қабул қилинди.