Яна бир туркомпания 290 кишига жадвалга киритилмаган рейсга авиачипта сотган

Ижтимоий тармоқларда Урганч халқаро аэропортида фуқаролар тўпланиб қолгани ҳақида маълумотлар тарқалди. Uzbekistan Airports ҳолат юзасидан расмий хабар берди.

Қайд этилишича, жорий йилнинг 4 ноябрь куни соат кечаси тахминан 2:00дан бошлаб “Урганч” халқаро аэропортига Урганч – Москва йўналиши бўйича IFly рус авиакомпаниясининг парвозини амалга ошириш ниятида бўлган йўловчилар келишни бошлаган.

“Бироқ, бу парвоз жадвалда мавжуд бўлмаган. Йўловчиларнинг сўзларига кўра, уларнинг барчаси Avia Market компанияси орқали авиачипталарини сотиб олган. Жами 290та чипта чартер рейсига сотилган”, дейилади маълумотда.

Билдирилишича, “Урганч” аэропорти ходимлари барча йўловчиларни жўнаб кетиш залига жойлаштириб, қўшимча стул ва скамейкалар ўрнатган, шунингдек чипталарни сотган компания билан боғланиб, йўловчиларга барча керакли маълумотларни беришни ва келиб чиққан вазиятни ҳал қилишни талаб қилган.

“Маълум бўлишича, Avia Market компанияси Ўзбекистон транспорт вазирлиги билан парвозни келишмаган ва керакли ҳужжатларни тайёрламаган. Айни пайтда вазият тартибга солинган ва Москвадан А-330 самолёти Урганчга учиб кетган. Аэропортда рўйхатдан ўтиш эълон қилинган”, дейилади хабарда.

Эслатилишича, Uzbekistan Airports АЖ фаолияти авиачипталарни сотиш билан боғлиқ эмас.

Аввалроқ, Тошкент аэропортида 200дан ортиқ йўловчи тўпланиб қолгани, уларнинг рейси жадвалга киритилмагани хабар берилганди.