Қашқадарёда Nexia машинасида олиб кетилаётган яроқсиз гўшт йўқ қилинди

Қарши шаҳри ҳудудида тўхтаб турган Nexia машинаси ППХ ходимлари томонидан тўхтатилганда унинг юкхонасида яроқсиз гўшт борлиги аниқланади. Бу ҳақда вилоят ИИБ ахборот хизмати хабар бермоқда.

Маълум қилинишича, 2021 йил 8 ноябр куни соат 22:00ларда А378 Самарқанд-Ғузор автомобил йўлининг 2-километрида йўл четида тўхтаб турган Nexia машинаси шу ҳудудда хизмат вазифасини олиб бораётган ППХ ходимларининг эътиборини тортади.

Бўлиб ўтган суҳбат жараёнида машина ичида ўтирган эркак ва аёл машина юкхонасида гўшт борлигини айтишади. Ходимлар қопларга жойланган гўштнинг яроқлилиги ҳақида ҳужжатни сўраганда улар ҳеч қандай ҳужжат кўрсата олмайди. Шундан сўнг улар Қарши шаҳар ИИБга олиб келинади ва гўшт тегишли тартибда ҳужжатлаштириб текшириш учун юборилади.

Вилоят ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази томонидан гўшт маҳсулотлари текшириб кўрилганда улар истеъмолга яроқсизлиги маълум бўлади.

Шундан сўнг мазкур гўшт маҳсулотлари белгиланган тартибда ёқиш йўли билан йўқ қилинган.