Норвегия суди 77 кишини ўлдирган Брейвикни муддатидан аввал озодликка чиқаришни рад этди

Норвегиянинг Телемарк округи суди неонацист Андрес Брейвикни муддатидан аввал озодликка чиқаришни рад этди.

Суд қарорида айтилишича, Брейвикда тузалиш аломатлари кўзга ташланмаган. 18 январ куни бўлиб ўтган суд комиссияси мажлисида Брейвик аввалги мажлислардаги каби қўлини нацистларча узатиб саломлашган.

Судда Брейвик амалга оширган оммавий қотиллиги учун радикализм тарғиботчиларини айблади.

«Миямни заҳарлашганида менинг айбим йўқ. 22 июлда (2011 йил) содир бўлган воқеаларда интернетда одамларнинг миясини заҳарлаб, уларни радикаллаштираётганлар айбдор», - деди у.

«Буларнинг барчасини ортда қолдиришга сўз бераман. Аммо бу менинг Норвегия ва Ғарбни националистик-социал эгаллаш учун курашмаслигимни англатмайди», - дея Брейвикнинг сўзларидан иқтибос келтиради Reuters агентлиги.

Суд Брейвикни озодликка чиқаришни хавфли деб топди.

«Унинг руҳий ҳолати ўзгармагани сабабли у 22 июлдаги ҳужумга олиб келган ҳаракатларини давом эттириши хавфи мавжуд», - дейилади Телемарк округи суди баёнотида.

Андерс Брейвик 2011 йил 22 июлда Осло марказида портлаш содир этиши натижасида саккиз киши ҳалок бўлган.

Сўнгра у ёшлар лагери жойлашган Утойя оролига йўл олган ва у ердагиларга қарата ўт очган. Оқибатда 69 киши, асосан ўсмирлар ҳалок бўлган.

Кейинчалик у «Ал-Қоида» каби террорчиликни амалга оширишни: видеокамера қаршисида Норвегия собиқ бош вазири Ҳарлем Брунтланднинг бошини узишни, бундан олдин эса уни тиз чўктириб, раҳм қилишини сўраб ёлворишга мажбурлашни орзу қилганини айтган.

Бирваракайига 77 кишининг ўлдирилиши Норвегияда Иккинчи жаҳон урушидан буён содир этилган энг қонли жиноят бўлган. Брейвик ҳали-ҳамон ўзини бу ҳаракати билан оқ танлиларни мультикультурализм ва миграциядан ҳимоя қилган шахс деб ҳисоблайди.

2012 йилда Брейвик 21 йилга озодликдан маҳрум этилган, кейинроқ у ўз тарафдорлари билан учрашиш имкониятидан мосуво қилишгани учун ҳуқуқни ҳимоя қилиш ташкилотларига шикоят йўллаган. Унинг бу шикояти қаноатлантирилмаган.

Норвегия қонунчилигига кўра, агар суд Брейвикни ҳали ҳам жамият учун хавфли деб топса, унинг қамоқда қолиш муддати ниҳоясига етиши билан яна узайтирилиши мумкин. Reuters агентлигининг қайд этишича, Брейвик ҳар йили муддатидан аввал озодликка чиқаришлари тўғрисида илтимоснома бериши мумкин.