Экология соҳасидаги ҳуқуқбузарлик ҳолатларини фото ва видеога олиб жўнатганларга пул тўланади

Вазирлар Маҳкамасининг “Давлат экологик назоратини амалга ошириш ҳамда моддий маданий мерос объектларини муҳофаза қилиш ва улардан фойдаланиш соҳасида замонавий механизмларни жорий этиш чора-тадбирлари тўғрисида”ги қарори лойиҳаси эълон қилинди.

Давлат экология қўмитаси, Бош прокуратура ҳамда Туризм вазирлиги томонидан атроф-муҳитни ва моддий маданий мерос объектларини муҳофаза қилиш ва экологик назорат соҳасида фуқароларнинг иштирокини таъминлашга қаратилган “Эконазорат” ва “Маданий мерос назорати” ахборот тизимлари ишлаб чиқилган.

Экология қўмитаси:

• ички ишлар органлари жамоат хавфсизлиги хизмати ва Миллий гвардиянинг патрулликка жалб этилган бўлинмалари ва Давлат экология қўмитаси давлат инспекторларидан иборат экология, атроф-муҳитни муҳофаза қилиш ва табиатдан фойдаланиш соҳасидаги ҳуқуқбузарликларга қарши курашиш бўйича “Экологик патруль” ишлаш тизимини жорий этиш бўйича қўшма тадбирларни ишлаб чиқади;
• 2022 йил 1 апрелдан бошлаб “Экологик патруль” ишлаш тизимини жорий этиш орқали доимий равишда экология, атроф-муҳитни муҳофаза қилиш ва табиатдан фойдаланиш соҳасидаги қонунчилик талаблари ижроси сўзсиз таъминланишини назорат қилишда ўзаро яқиндан ҳамкорликни ўрнатади ҳамда қўшма профилактик тадбирларни ўтказиш амалиётини йўлга қўяди;
• аҳоли ўртасида экологик маданиятни шакллантириш (шу жумладан, кўча, йўлкалар ва турар жойларни озода сақлаш) бўйича тарғибот ишларини олиб боради, давлат назорати билан бир қаторда жамоатчилик назоратини кучайтиради;
• Ички ишлар вазирлиги билан биргаликда Давлат экология қўмитаси тизимидаги мавжуд автотранспорт воситаларини махсус товуш чиқарувчи, ёритувчи ускуналар ва ажратувчи белгилари билан жиҳозлаш чораларини кўради.

Давлат экология қўмитаси, Бош прокуратура ҳамда Ахборот технологиялари ва коммуникацияларини ривожлантириш вазирлигининг:

• ахборот тизимларини 2022 йил 1 апрелдан бошлаб ишга тушириш;
• экология, атроф-муҳитни муҳофаза қилиш ва табиатдан фойдаланиш соҳасидаги ҳуқуқбузарлик ҳолатлари (дарахтлар, буталар, бошқа ўсимликлар ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш ҳолатлари бундан мустасно) бўйича фотосурат ва видеоёзувларни юборган шахсларни ҳуқуқбузардан ундирилган жарима миқдорининг ўн беш фоизи;
• дарахтлар, буталар, бошқа ўсимликлар ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш бўйича ҳолатлари тўғрисидаги фотосурат ва видеоёзувларни юборган шахсларни ҳар бир тасдиқланган ҳолат бўйича ҳуқуқбузардан ундирилган маблағлар ҳисобидан базавий ҳисоблаш миқдорининг бир бараварига тенг миқдордаги пул мукофоти билан рағбатлантириш;

моддий маданий мерос объектларини муҳофаза қилиш ва улардан фойдаланиш тўғрисидаги қонун бузилиши ҳолатлари ҳақидаги фотосуратлар ва видеоёзувларни юборган шахсларни:

• маъмурий ҳуқуқбузарлик аниқланганда – суднинг маъмурий жазо қўллаш тўғрисида қонуний кучга кирган қарорига асосан базавий ҳисоблаш миқдорининг 1 баравари миқдорида;
• жиноят аниқланганда – суднинг қонуний кучга кирган айблов ҳукмига асосан базавий ҳисоблаш миқдорининг 3 баравари миқдорида пул мукофоти билан рағбатлантириш тўғрисидаги таклифига розилик берилади.

Ахборот тизимидаги мобиль иловалар қуйидаги имкониятларни назарда тутади:

• давлат экологик назорати объектлари, муҳофаза этиладиган табиий ҳудудлар фаолияти, дарахтлар ва буталар кесилишининг олдини олиш, чиқиндилар ва моддий маданий мерос объектлари билан боғлиқ ишларни амалга ошириш устидан самарали жамоатчилик назоратини ўрнатиш;
• жисмоний шахслар томонидан аниқланган экология, атроф-муҳитни муҳофаза қилиш ва табиатдан фойдаланиш, шунингдек, моддий маданий мерос объектларини муҳофаза қилиш ва улардан фойдаланиш соҳасида ҳуқуқбузарлик ҳолатлари тўғрисидаги маълумотларни (фото ва видео материалларни) Ички ишлар вазирлиги, Давлат экология қўмитаси ҳамда Маданий мерос агентлигига манзил (географик) белгилари бўйича юбориш;
• соҳага оид ҳуқуқбузарликлар ҳақида хабар берган жисмоний шахсларга белгиланган тартибда пул мукофотларини тўлаш;
• соҳага оид ҳуқуқбузарликлар, норматив-ҳуқуқий ҳужжатлар ва статистик маълумотлар базаси билан танишиш;
• содир этилган маъмурий ҳуқуқбузарликлар юзасидан маъмурий ҳуқуқбузарлик ҳужжатлари (баённома ва қарорлар)ни электрон шаклда тузиш орқали ушбу ҳуқуқбузарликлар ҳақидаги маълумотларни Ички ишлар вазирлигининг “Е-mа’muriy ish” тизимига киритиш;
• мобиль иловалар орқали тақдим этилган фото ва видео материаллар бўйича масъул органлар томонидан амалга оширилган ишлар ҳолатини мониторинг қилиш, шунингдек, қонунчилик ҳужжатлари ижросини таъминлаш юзасидан ҳуқуқбузарларга аввал берилган мажбурий кўрсатмалар ва талабномалар бўйича амалга оширилган бошқа зарур чора-тадбирлардан хабардор бўлиш;
• ҳудудлар ва туман (шаҳар)лар кесимида ахборот тизимига келиб тушган хабарлар орқали аниқланган ҳуқуқбузарликлар тўғрисида маълумотларни жорий этиш ҳамда юритиш.