Қирғизистон собиқ президенти 2020 йил кузида ҳокимиятни эгаллашга уриниш иши бўйича судга олиб келинганди.
Қатор жиноят ишларида гумонланаётган Қирғизистон собиқ президенти Алмазбек Атамбоев соғлиги ёмонлашгани сабабли Бишкекдаги Первомайск район судидан тез ёрдам машинасида олиб кетилди.
Атамбоев адвокатларининг маълум қилишича, собиқ президент ўзи жазо ўтаётган 47-сонли ахлоқ тузатиш колониясига қайтарилган.
Собиқ президент бир неча ойдан буён қатор ишлар бўйича суд жараёнларида қатнашмоқда. У бу сафар 2020 йил кузида ҳокимиятни эгаллашга уриниш иши бўйича судга олиб келинганди.
Атамбоев 2020 йил июнда коррупцияда айбдор деб топилиб 11 йил 2 ойга озодликдан маҳрум қилинганди.
Тергов ҳужжатига кўра, у бир гуруҳ шахслар билан криминал авторитет Азиз Батукаевнинг қамоқдан озод қилинишига ёрдам берган.
Батукаев иши бўйича ҳукмдан сўнг Атамбоев 47-сонли ахлоқ тузатиш колониясига жойлаштирилган.
