Бензема «Олтин тўп» учун қадам ташлади, Эмери «Бавария»ни ранжитди. ЕЧЛ ўйинлари

«Қироллик клуби» ҳужумчиси Чемпионлар лигасида қаторасига иккинчи ўйинда уч гол урмоқда. Мадридликлар яримфинал учун жиддий қадам ташлади.

Челси — Реал 1:3
Голлар: Ҳавертц (40) — Бензема (21, 24, 46).
Челси – Менди, Жеймс, Силва, Рюдигер, Кристенсен (Ковачич, 46), Аспиликуэта, Жоржиньо (Лофтус-Чик, 64), Канте (Зиёш, 46), Пулишич (Лукаку, 64), Маунт, Ҳавертц. 
Реал – Куртуа, Карвахаль, Алаба, Милитао (Начо, 64), Менди, Модрич, Кроос (Камавинга, 74), Каземиро, Вальверде (Себальос, 86), Бензема (Бэйл, 86), Винисиус Жуниор.
Огоҳлантиришлар: Милитао (14), Рюдигер (19).

ЕЧЛнинг амалдаги ғолиби ва турнирда энг кўп ғолиб бўлган клуб учрашуви мухлисларга чиройли ўйин туҳфа этиши шарт эди. Ва мухлислар биринчи бўлимдаёқ кутилган ҳиссиётларга эга бўлишди.

Албатта, ўйиннинг асосий қаҳрамони — Бензема. «Реал» форварди феноменал мавсум ўтказмоқда: у мадридликларнинг 36 ўйинида 37 гол уриб улгурди ва 34 ёшли французни пенсияга чиқаришга шошилганларнинг барчасининг овозини ёпмоқда. Бошқа томондан «Олтин тўп»ни Мессига топширганларнинг устидан кулмоқда.

Ўйиндан олдин «Челси» бош мураббийи Томас Тухель «Реал» ҳужумчисининг ўйинидан ҳайратланишини яширмади. У Бенземани айнан кўп йиллар мобайнида юқори даражасини сақлаб қолгани учун мақтади. Лондонликларда эса Дрогбадан кейин у каби савияда ва барқарор футбол намойш этган ҳужумчи бўлмаган. Бу мавсумда ҳам кўкларда марказий ҳужумчи муаммоси мавжуд: жамоа Лукаку қиёфасида тўпурар ҳужумчига эга бўлгандек эди, аммо у ишончни оқламади ва асли яримҳимоячи бўлган Ҳаверц «тўққизлик» ролини бажармоқда.

Аммо у барибир Бензема бўла олмайди. Француз футболчиси топ-учрашувлар тақдирини ўзи ҳал қила олади. Айнан у «ПСЖ»га қарши мураккаб ўйинда 17 дақиқада ҳет-трик қайд этиб вазиятни ўзгартирганди, усиз «Реал» Мадридда «Барселона»га 0:4 ҳисобида мағлуб бўлди. «Стэмфорд Бриж»даги чоракфинал ўйинида майдонга тушди — ва яна уч гол. Чемпионлар лигаси плей-оффида топ-клубларга қарши икки ўйинда олти гол — бунақасига мухлислар анчадан буён гувоҳ бўлишмаганди. 

Шу билан бирга Бенземанинг порлаши кўзни қамаштирмаслиги керак: унинг голлари — «Челси» футболчиларининг қўпол хатолари натижаси бўлди. Лондонликлар мудофааси ҳатто Англияда ҳам энг умидли ҳимоялар қаторида тилга олинмай қўйган: ўтган шанбада кўклар ўз уйида «Брентфорд»га 1:4 ҳисобида ютқазишди, барча голлар марказий ҳудуддан ўтказилди. Тухел жамоаси иккинчи бўлимда уч марказий ҳимоячи билан ўйнай бошлади ва тўрт гол қўйиб юборди. Германиялик мутахассис ЕЧЛ ўйинида илк дақиқаларданоқ шу схемани танлади, аммо бу ҳимояда қўпол хатолардан сақлай олмади. Кристенсен ва Тиагу Силва биргаликда Винисиуснинг узатмасини ёпишга чопишди ва Бенземани ҳимоясиз қолдириб, у ҳисобни очишига йўл қўйишди. Иккинчи голда ҳам шунга ўхшаш вазият: Модрич тўпни дарвозабон ҳудудига узатиб берди, Силва Бенземани ёпа олмади, Кристенсен эса негадир тўп узатилаётган нуқтадан ўзини олиб қочди. Ёзда «Барселона»га ўтиши кутилаётган даниялик ҳимоячининг мадридликларга қарши ўйинидан каталонияликлар ҳайратда эмаслиги аниқ.

«Реал» танаффусгача йирикроқ ҳисобда чиқиб кетиши мумкин эди: ўйин бошида Винисиуснинг зарбаси тўсинга тегди, 42-дақиқада эса Бензема қулай вазиятни йўққа чиқарди. Бу эпизодда Каримга бораётган тўпни Жоржиньо тўсди, ҳужумчи эса йўналишини ўзгартирган тўпни дарвозага тўғри йўналтира олмади, бу вақтда «Челси» ҳимоячилари ортда қолиб кетишганди.

Тухель ҳисоб 0:2 кўринишида ҳисобни ўзгартириш учун нималар қилди? Жамоадан қанотларни ишга тушириш ва Ҳаверц учун ўйнашни сўради. Бир сафар ўхшади, Жеймс Жоржиньо билан комбинацияда немис футболчиси учун голли вазият яратишди ва «Челси» мухлисларида умид уйғонди.

Аммо Бензема раҳм қилмади: унга иккинчи бўлим бошидаги 45 сония улардан бу умидни олиб қўйиш учун кифоя қилди. Карим аввалги икки голини ўзи учун одатдагидек — керакли ақтда ўзи учун бўшлиқ топа олган ҳолда бош билан урди. Учинчи гол ҳам «Реал» форварди учун хос услуб бўлиб бормоқда: у олдинроққа чиқиб тўпни қабул қилган Мендига босим қилди ва уни хато қилишга мажбурлади, тўпга эга чиққач, узоқ масофадан бўш дарвозага жойлаб қўйди. Чемпионлар лигасида бундай ҳолат илк бор кузатилиши эмас. Кариус, Ульрайх, Доннарумма — топ-клублар дарвозабонлари Бензема ва ўзларининг босим остида ўйнай олмасликлари қурбони бўлишган.

Мендининг хатоси шунинг учун ҳам ҳалокатли эдики, танаффусда Тухель жамоа тузилишида жиддий ўзгаришлар қилганди. Канте ўрнига майдонга Ковачич туширилди (биринчи бўлим давомида мухлислар Фабрегасни туширишни ҳам сўрашганди), ҳимоядаги Кристенсен ўрнини вингер Зиёшга бўшатиб берди, яъни схема худди «Реал»даги каби 4-3-3 кўринишига келди.

Бу «Челси»га майдон марказида эркинроқ нафас олишга имкон берди, тўпга эгалик қилиш бўйича устунлик «Реал»дан тортиб олинди ва зарбалар сони ҳам ошди. Умуман олганда, лондонликлар танаффусдан кейин яхшироқ ўйнай бошлашди, аммо бунинг сабабларидан бири ҳисоб мадридликларни тўла қаноатлантириши ҳам эди. «Челси» гол уришга яқин келди: Куртуа Аспиликуэтанинг узоқдан йўллаган зарбасини олиб чиқди, Лукаку эса бир неча метрдан туриб бош билан аниқ зарба бера олмади.

Нима бўлганда ҳам «Реал» ғалабага ҳақлироқ эди. Ўйин тақдирини биргина Бенземанинг ҳаракатлари эмас, жамоа тўғри ўйнагани ҳам ҳал қилди. «Челси» «Реал»га истаганча ўйнашга қўйиб берди, рақиб сафида дунё даражасидаги форвард бўлган ҳолатда эса бундай қилиб бўлмайди.

Эмери «Бавария»га қарши ажойиб ўйин ўтказди, Испаниянинг еттинчи ўриндаги жамоаси «Вильярреал» яримфиналга чиқишга бел боғлаган

Вильярреал — Бавария 1:0
Гол: Данжума (8).
Вильярреал – Рульи, Фойт (Орье, 81), Альбиоль, Пау Торрес, Эступиньян, Ло Чельсо, Коклен (Педраса, 59), Капу, Парехо, Х.Морено, Данжума (Чуквуэзе, 81). 
Бавария – Нойер, Павар (Зюле, 71), Эрнандес, Упамекано, Дэвис, Гнабри (Сане, 62), Киммих, Мусиала, Мюллер (Горетцка 62, Рока 90+5), Левандовски, Коман.
Огоҳлантириш: Эступиньян (74).

Чоракфинал учун қуръа ташланганида «Вильярреал»нинг ҳолати худди «Бенфика»никидек эди. Яъни бу қарама-қаршилик натижаси маълум эканини, испанлар бу жуфтликда аутсайдерлигини айтишди. Аммо «сариқ субмариналар» — Европа Лигасининг амалдаги ғолиби, жорий мавсумда икки сафар учрашувида — «Аталанта» (гуруҳ босқичидан чиқиш учун ҳал қилувчи ўйинда 3:2) ва «Ювентус»ни (нимчорак финалда 3:0) ғалабага эришганини унутмаслик керак. Унаи Эмери асосий еврокубок плей-оффидаги омадсиз сериясига ниҳоят барҳам берди.

Ўйин арафасида мураббий жамоаси ўзининг кучли томонларига эътибор қаратиши кераклиги ҳақида айтди. Чемпионлар лигасидаги 50-ўйин Эмери учун мураккаб синов эди. Бу бир йил олдин Левандовски сафдан чиқиб, кучсизланган «Бавария» эмасди, жамоадаги барча асосий ижрочилар сафда.

Жарроҳлик амалиётидан кейин формасини тиклаган Нойердан ташқари, ўтган уик-эндда Горецка ва Дэйвис ҳам майдонга қайтганди. Шу кунларда 2021 йил якунларига кўра Шимолий Американинг энг яхши футболчиси деб топилган канадалик вингер коронавирусдан кейин юракдаги муаммоларга дуч келганди. У жамоа машғулотларига қўшилишига 22 март кун рухсат берилди, Вильярреалдаги ўйин Дэйвис учун 17 декабрдан буён биринчиси бўлди.

Умуман олганда, рақиб даҳшатли. Аммо майдонда испанлар «Бавария»дан қўрқиб ўтиришмади. «Сариқ субмариналар» ўз услубида маҳорат билан темпни ўзгартириб ўйнашди. Гоҳ майдоннинг ўзлари томонида бир неча ҳимоя чизиғи ўрнатишди ва рақибни ўраб олишди. Гоҳ майдон марказида ёки рақиб ҳудудида агрессив прессинг қўллаб, ҳужумлар уюштиришди.

Гол учун илк жиддий ҳужумнинг ўзи етарли бўлиб чиқди. Ло Сельсо ўнг қанотда Жерар Морено билан девор услубида ўйнаб, рақиб жарима майдонига кириб борди, унинг марказ томон узатмасидан кейин Дани Парехо зарба берди, тўп йўналишига Данжума «товони»ни қўйди ва ҳисоб очилди. Нидерландиялик футболчи турнирда олти гол урди ва клубнинг ЕЧЛдаги энг яхши тўпурарига айланиб олди.

«Вильярреал» ҳужумлардан максимал натижа чиқаришга ҳаракат қилди, биринчи бўлим якунида Кокленнинг ҳаволатиб йўллаган узатмасидан кейин тўп Нойер қўриқлаётган дарвоза чизиғини кесиб ўтди, аммо кичик офсайд «Бавария»ни танаффусга даҳшатли ҳисобда чиқиб кетишдан асради. Аммо бу бўлимда барибир мюнхенликлар ўзига ўхшамади, 45 давомида меҳмонлар бирор марта дарвоза соҳасига аниқ зарба йўлламади.

Муваффақиятсиз раунд ўтказган боксчи каби бўлган немисларга танаффус керак эди ва Юлиан Нагельсманн танаффусда жамоани ўзига келтиришга ҳаракат қилди. Иккинчи бўлимда «Вильярреал» вақти вақти билан жарима майдонига қамала бошлади, Мюллерга эса дарвозани ишғол этишга бир неча сантиметр етмади. Лекин қарши ҳужумлар уюштириш учун бўшлиқларга эга бўлган испанлар ҳам бир неча дақиқа ичида Морено иштирокида иккита хавфли вазият билан жавоб қайтаришди. Биринчи ҳолатда баварларни дарвоза устуни қутқарди. Иккинчисида — Дэйвиснинг подкати.

Кейин «Вильярреал»нинг энг яхши тўпурари майдон марказига чиқиб келган Нойерни бўш қолган дарвозасидан тўп олиб чиқишга мажбур қилиши мумкин эди, аммо германиялик дарвозабоннинг узатмасини эгаллаб олган Морено узоқ масофадан аниқ зарба бера олмади. Агар мезбонлар иккинчи бўлимдаги вазиятларидан фойдалана олишганида, Испанияда айни вақтда еттинчи ўринда турган жамоанинг футболини мукаммал деб аташ мумкин бўларди.

Эмери ўз олдига қўйган вазифасини бажарди — жавоб ўйини олдидан интрига сақлаб қолинди. «Бавария» бу қарама-қаршиликда ҳамон фаворит бўлиб қолаётган бўлса-да, «Вильярреал» — Мюнхенда етти гол ўтказиб берадиган «Зальцбург» эмас (нимчорак финалда австрияликлар ўз уйида 1:1 ўйнаган, жавоб ўйинида 1:7 ҳисобида ютқазган). Немисларда эса қўшимча мотивация бор, Испаниядаги ўйин охирида Пау Торрес Горецканинг юзини қонга белаганидан кейин ҳам арбитр пенальти белгиламади. Эмери учун ғазабга минган «Бавария»ни тўхтатиш — жуда қийин бўлади.