Майкл Кэррик Даниэл Фарке билан бўлиб ўтган олти дуэлдан фақат биттасида ғалаба қозонганди, у ҳам бўлса – Лига кубогида. У «Мидлсбро» бошқарувида чемпионшипда «Лидс»га қарши ўтказган тўрт ўйинда ҳам германиялик мутахассиснинг қўли баланд келганди, ўтган мавсумнинг иккинчи даврасида эса йоркширликлар «Олд Траффорд»дан ғалаба билан қайтганди (2:1).
Мураббийларнинг бу сафарги тўқнашуви эса кўпчилик Кэррикнинг истеъфосини талаб қилаётган даврга тўғри келди. Ўйиннинг дастлабки қисми анча зерикарли кечди – 25 дақиқа ичида дарвоза томон биргина зарба йўлланди. Бу оралиқдаги энг ёдда қоларли эпизод эса 19-дақиқада Гудмундссоннинг бутсасининг остки қисми билан Сантоснинг оёғига зарба бергани бўлди. Бундай фол учун қизил бериш ҳам мумкин эди, аммо ҳакам мезбонлар футболчисини кечирди ва сариқ карточка билан кифояланди.
Бўлимнинг иккинчи қисмида вазиятлар юзага кела бошлади. Мбеумо бир неча имкониятларга эга бўлди ва фақат учинчи уринишда ўз мақсадига эришди ва Юри Тилеманснинг қанотдан узатмасини голга айлантирди. Бу камерунлик футболчи учун жорий мавсумдаги тўртинчи голга айланди.
Аммо шу куни Кэррик Фаркега қарши ўйинлардаги нохуш анъанасини барибир йўққа чиқара олмади. Иккинчи бўлим бошида мезбонлар ҳужумкорликни оширишди ва бу Калверт-Люин ҳисобни тенглаштириши билан якунланди. Инглиз ҳужумчиси стандарт вазият чоғида Муҳаремович орқали келган тўпни дарвозага киритиб юборди – 1:1.
«Юнайтед» қаторасига учинчи ўйинда дуранг ўйнади ва ҳамон турнир жадвалининг иккинчи қисмида ва пешқадамлар гуруҳидан кўра хавфли зонадагиларга яқинроқ. Ташқарида октябр, «қизил иблислар» эса мавсум стартидаги етти ўйинда атиги бир ғалабага эришган. Бунақа ёмон старт жамоа тарихида ҳали бўлмаганди. Майкл Кэррикнинг истеъфоси ҳақидаги чақириқлар янада баландроқ янграй бошлади.
Параллел ўйинда эса мавсумни ўта ёрқин бошлаган «Брайтон» дастлабки ўн дақиқа ичида учта гол урди, якуний 5:0 ҳисоби эса «чайкалар»нинг «Кристал Пэлас» устидан 1956 йилдан буён қозонган энг йирик ғалабаси бўлди (ўшанда жамоалар учинчи дивизионда иштирок этарди). Фабиан Ҳюрцелер жамоаси сермаҳсуллик борасида фантастик кўрсаткич қайд этмоқда: 7 турда 23 гол урилди. АПЛ тарихида бундан юқорироқ кўрсаткични фақат уч клуб қайд этганди – «Манчестер Сити» (27), «Арсенал» ва «МЮ» (24 тадан).
Диего Гомеснинг голи эса нафақат ўйиннинг, балки тур безагига айланди. Парагвайлик яримҳимоячи майдон марказида турган ҳолда тўпни дарвозабон устидан ошириб дарвозага йўллади. Бундай ҳаракат «Брайтон»нинг ҳозирда ўзига бўлган ишончининг яққол намунаси бўлди. Opta маълумотига кўра, зарба берилган нуқтадан дарвозагача бўлган масофа 51 метрни ташкил этган. Бу Рунининг 2017 йилда 58 метрдан урган голидан бери энг узоқ масофадан урилган гол бўлди. Бу ғалабадан кейин «Брайтон» онлайн жадвалда иккинчи ўринга кўтарилиб олди.
«Брайтон» тур якунларига кўра иккинчи ўринда қолиши мумкин эди, аммо «Арсенал» қийин ўйинда ҳам ғалаба қозонишни уддалади. «Канонирлар» ўзи учун ноқулай бўлган рақиб майдонида (охирги икки мавсумда «Сити Граунд»да ҳисоб очилмаганди, умуман бу стадионга қилинган охирги 6 ўйинда биргина ғалабага эришилганди) ўйиннинг охирги қисмида ғалаба голини урди. Мезбонлар бутун ўйин давомида қуйи блокда ҳимояланишди, лекин 80-дақиқада Эдегорнинг тўпни рақиб жарима майдонига етказишга бўлган ҳаракати яна бир бор ҳимоячилар томонидан блокланганида Райс ҳужумни иккинчи темпда давом эттирди ва чап қанотда ўзини таклиф қилган Мадуэкега пас берди. Иккинчи бўлимда захирадан ўйинга қўшилган инглиз футболчиси эса жарима майдонига кириб, финт билан рақибни йўлдан олди ва ўзи учун ноқулай бўлган ўнг оёғида зарба берди. Тўп ҳимоячига теккан ҳолда йўналишини ўзгартириб, дарвозабонни доғда қолдирди. «Ўрмончилар» шундан кейингина олдинга ташланди, аммо бир неча вазиятлардан фойдалана олмади. Райс ва Консанинг ҳимоядаги жонбозлиги лондонликлар учун ғалабани сақлаб қолди. Микел Артета жамоаси муҳим очколарни қўлга киритди ва турнир жадвалида «Сити»ни уч очколик фарқ билан таъқиб қилишда давом этмоқда.
Винисиус Жуниор «Вилярреал»га қарши ўйиндаги ҳаракатлари учун тўрт ўйинга дисквалификация қилиниши «Реал» бошланғич таркибида иккита муҳим ўзгаришга олиб келди. Биринчидан, «Рома» билан ўйин қаҳрамонларидан бири Эндрик ҳақли равишда бошланғич таркибдан ўрин олди, Диоманде эса ниҳоят ҳужумнинг чап қанотида туширилди, у олдинги жамоасида ҳам, Кот-д'Ивуар миллий жамоаси сафида ҳам айнан шу қанотда самаралироқ эканини кўрсатганди. Айнан ушбу африкалик футболчи биринчи бўлимда икки голли вазият яратиб берди ва фаолиятида илк бор қаторасига икки ўйинда икки ассист муаллифига айланди.
У аввалига тўпни Беллингҳэмдан қабул қилиб олиб, Арда Гулер олдинда ўзини таклиф қилишини кутиб турди, туркиялик яримҳимоячи эса унинг пасини ажойиб траекторияда тўсин остидан дарвоза тўрига йўллади. Кейин эса Ян ва Жуд Мбаппе учун голли вазият яратиб беришди. Килиан дарвозабонга ҳеч қандай имкон қолдирмади ва Европа лигаларида урилган голлар сони бўйича афсонавий Бернар Лякомб билан тенглашиб олди (255). У француз тўпурарлари рейтингида Карим Бенземани (281 гол) қувиб етишга ҳам кўп қолмади.
У шу ўйиннинг ўзида Лякомбни ортда қолдирди ва Бенземани таъқиб этишга киришди. Диоманденинг ажойиб пасидан кейин у жарима майдонига кириб борди ва пеналти ишлаб, уни ўзи паненка зарбаси билан аниқ ижро этди. Буэнонинг ҳисобни қисқартирувчи голи эса мадридликларни яна олдинга бошлади ва ўйиннинг энг яхши футболчиси бўлган Диоманде ўз номига ҳам гол ёзиб қўйди.
Ўйин охирида эса Эдер Милитао олқишлар остида «Бернабеу»га қайтди. Жозе Моуринио класикога бир ҳафта қолганида ҳимоя учун қўшимча опцияга эга бўлди.
