Зеленский Путиннинг «Украинадаги одами» қўлга олинганини маълум қилди

12 апрель куни кечқурун Украина президенти Володимир Зеленский Олий рада депутати, Россиянинг Украинага бостириб киришидан кейин уй қамоғидан қочиб кетиб, ғойиб бўлиб қолган Виктор Медведчукнинг қўлга олингани акс этган суратни эълон қилди.

Украина бош прокуратураси Медведчукни давлатга хиёнатда ва террорчилик ташкилотлари билан ҳамкорлик қилишда айблаган.

«Украина хавфсизлик хизмати махсус операцияни муваффақиятли бажарди. Баракалла!», деб ёзган Украина президенти. У хабарга ушбу сиёсатчи ҳарбий либосда қўлларига кишан тақилган ҳолда ўтиргани акс этган фотосуратни хабарга илова қилган.

Зеленский Медведчукнинг қандай қўлга туширилгани юзасидан тафсилотларни кейинроқ ошкор этишини билдирган. Украина хавфсизлик хизмати ҳам ҳибсга олинган сиёсатчи фотосуратини тармоқда тарқатган.

Яна бир сурат Украина хавфсизлик хизмати томонидан тармоққа жойланган. Унда қуйидагича матн келтирилади:

«Сен россияпараст сиёсатчи бўлишинг ва йиллар давомида босқинчи давлат учун ишлашинг мумкин. Сен сўнгги вақтларда одил суддан яширинишинг мумкин. Устингга маскировка учун ҳарбий либос кийиб олишинг мумкин… Аммо бу сенга жазодан қочишда ёрдам бера оладими? Асло! Сени кишанлар кутади. Ва сен каби Украинанинг барча сотқинларини! Россияпараст хоинлар ва Россия махсус хизматлари жосуслари, ёдда тутинг — сизнинг жиноятларингиз учун жавобгарликка тортиш муддати чекланмаган».

Украина хавфсизлик хизмати раҳбари Иван Баканов ўз ходимларига Медведчукни қўлга олишдаги «хавфли, яшин тезлигида ва кўп даражали махсус амалиёт» учун миннатдорчилик билдирган.

«Бу йигитчангизни алмаштирайлик»

13 апрелга ўтар кечаси қилган видеомурожаатида Зеленский «Путиннинг куми»ни асирликдаги украин аскарларига алмаштиришни таклиф қилди.

«Медведчукнинг Космонавтлар кунида қўлга олингани жуда рамзий маънога эга. У 48 кун яширинди. Ва ниҳоят мамлакатимиздан қочиб кетишга уринишга қарор қилди. Нима деймиз, бу «космонавт» учун - машҳур «Қани кетдик!» ибораси ўхшамади.

Мен айниқса у ҳарбий камуфляждан фойдаланишини орсизлик деб биламан. Маскировка қилмоқчи бўлган. Мана шундай «жангчи». Мана шундай ватанпарвар. Демак, агар Медведчук ўзи учун ҳарбий формани танлаган бўлса, унинг иши ҳарбий давр қоидалари бўйича кўриб чиқилади.

Россия Федерациясига бу йигитчасини бизнинг Россия асирлигидаги йигит ва қизларимизга алмаштиришни таклиф қиламан. Шунинг учун бизнинг ҳуқуқ-тартибот органларимиз ва ҳарбийларимиз бундай имкониятни кўриб чиқиши муҳим», деган Украина президенти.

Тақиқланган партия депутати
Россия президенти матбуот котиби Дмитрий Песков бу сурат қанчалик ҳақиқатга мос келиши ҳақида айта олмаслигини маълум қилган.

«Медведчук ҳақидаги хабарни кўрдим. Мен бу қанчалик ҳақиқатга мослиги борасида ҳеч нарса дея олмайман. Бирор тасдиқсиз нимадир гапириш нотўғри бўлади... Украинада фейк хабарлар шу даражада кўп, уларнинг сони мамлакатда қандай сараланаётганига ҳам шубҳам бор», деган Песков журналистларга.

Россия Украинага бостириб киргач, фаолияти тақиқланган партиялар қаторига кирган «Мухолифат платформаси — Ҳаёт учун» партияси раиси бўлган Виктор Медведчук 2021 йил 13 майидан буён уй қамоғида эди.

Россия ҳарбийлари Украинага бостириб кирган маҳалда у ғойиб бўлиб қолган. Медведчукнинг адвокати у таҳдидлар туфайли Киевдаги уйини тарк этгани, аммо шаҳарда хавфсиз жойда қолаётганини айтганди.

Медведчук нимада айбланган

2021 йилда Украина миллий хавфсизлик ва мудофаа кенгаши Виктор Медведчук ва унинг рафиқаси Оксана Марченкога қарши санкция киритган. Унинг ҳисоблари музлатилган, у билан алоқадор бўлган телеканаллар ёпилган.

Кўп ўтмай Медведчукка бир неча моддалар бўйича айблов эълон қилинган. У Қрим аннексия қилинганидан кейин ушбу ҳудуддаги энергетик лойиҳаларни амалга оширишда Россия билан ҳамкорлик қилишда, шунингдек сафдоши Тарас Козак билан биргаликда табиий ресурсларни ўзлаштириш, Москвага махфий маълумотларни етказишда ва Донбасснинг тан олинмаган ДХР ва ЛХР назоратидаги ҳудудларидан ноқонуний кўмир импортига алоқадорликда айбланган. Медведчук ўз манзилига қаратилган барча айбловларни рад этган ва уларни сиёсий таъқиб деб атаган.

Медведчук 2000-йиллар бошида, Олий рада раиси ўринбосари эканида Россия президенти Владимир Путин билан танишган.

У «Россия 1» учун интервьюсида Владимир Путин 2004 йилда туғилган кичик қизининг чўқинтирган отаси бўлганини айтган.

Россиянинг Украинага босқини арафасида Ғарб нашрлари Владимир Путин Киевдаги ҳукуматни ағдариб, Медведчукни ҳокимиятга келтиришни режалаштиргани ҳақида ёзишганди.