Зеленский бу ҳақда 19 октябр куни АҚШ сенаторлари Ричард Блументал ва Том Тиллис билан онлайн мулоқотда гапирган. Унинг учрашувдаги нутқи ижтимоий тармоқларда эълон қилинган, деб ёзади DW.
Украина президентининг айтишича, Пентагон PURL — Украинанинг устувор эҳтиёжлари рўйхати дастури доирасида ҳамкорлар маблағ ажратган ракеталарни етказиб беришни кечиктирмоқда. Жўнатишга тайёр пакетлардан бири АҚШ мудофаа вазири Пит Ҳегсетнинг имзосини кутмоқда.
Зеленский Европа давлатларидаги захиралардан Украинага Patriot учун ракеталар бериш масаласи ҳам Вашингтон рухсатига боғлиқ бўлиб қолаётганини таъкидлаган.
«Ҳамкорларимиз, жумладан, Европадагилар ҳам ўз захираларидан бизга Patriot учун тутиб қолувчи ракеталарни етказиб беришга АҚШ рухсат беришини кутмоқда. Буларнинг барчаси бизга кўмакни секинлаштириш бўйича қандайдир сиёсий қарор қабул қилинганини кўрсатмоқда», — деган у.
Украина президенти ҳарбий ёрдамдан ташқари, ахборот алмашинуви ва алоқа тизимлари билан боғлиқ муаммоларни ҳам тилга олган. Унинг сўзларига кўра, сўнгги вақтларда Киев Россиянинг баллистик ракета ҳужумлари ҳақида АҚШдан уч марта огоҳлантириш олмаган.
Шунингдек, Зеленский Starlink’нинг ҳарбий алоқа хизматлари пакети — Starshield’дан фойдаланишдаги чекловлар юзасидан ҳам тўлиқ тушунтириш берилмаганини айтган. У бу ҳолатларни «дўстлар ўртасидаги муносабатларда изоҳлаш қийин бўлган Америка томони қарорлари» деб баҳолаган.
Зеленскийнинг билдиришича, Киев Доналд Трамп талаб қилаётганидек Россия нефтни қайта ишлаш заводларига ҳужумларни 30 кунга тўхтатиши мумкин. Бироқ бунинг шарти — АҚШ Украинага Patriot ҳаво ҳужумидан мудофаа тизимлари учун тутиб қолувчи ракеталарни тақдим этиши.
