Кириш имтиҳонларида қатнашиш учун қабулдан олдинги йилларда ўқишни тугатган абитуриентлардан тўлов ундирилади. Фақат маълум тоифадаги абитуриентлар бундай тўловдан озод қилинган. Бу йилги қабулдан имтиҳонда қатнашиш учун пул тўламайдиган абитуриентлар тоифаси кенгайди.
Фото: KUN.UZ
Давлат тест марказининг маълум қилишича, қонунчиликка мувофиқ, кириш имтиҳони ўтказилаётган йилдан олдинги йилларда мактаб, коллеж, лицейни тугатган абитуриентлардан тест синовларида иштирок этиши учун БҲМнинг ярим баравари миқдорида тўлов ундирилади.
Ўқишни тест ўтказилаётган йили тугатган битирувчилар, ногиронлиги бўлган шахслар ва меҳрибонлик уйлари болалари, болалар шаҳарчасининг битирувчиларидан бундай тўлов ундирилмайди.
Президент фармонига кўра, тўлов ундирилмайдиган абитуриентлар тоифасига:
- “Ижтимоий ҳимоя ягона реестри” ахборот тизимида рўйхатга олинган шахслар ва уларнинг фарзандлари;
- “Ёшлар дафтари”да рўйхатда турувчи ёшлар ҳам киритилди.
Бу йилги қабулда бу икки тоифадаги абитуриентлар ҳам имтиҳон учун пул тўламайди.
