10 май куни ижтимоий тармоқларда энергетика соҳасини эркинлаштириш яна ортга сурилиши мумкинлигига оид хавотирлар пайдо бўлди. Иқтисодчи Отабек Бакировга кўра, пандемия сабабли кечиктирилган ислоҳотга эндиликда Россия–Украина урушининг оқибатлари тўсиқ бўлиши мумкин.

Бакиров расмийлар бу мавзуни кун тартибига олиб чиқмай қўйгани, “ҳамма жим бўлиб кетгани”ни таъкидлаган. Шунингдек, давлат корхоналари орасида энг кўп зарар билан ишлаётган 10та корхонадан 7таси бевосита ёки билвосита энергетика билан боғлиқлигини қайд этган.

2021 йилда давлатга қарашли 10та корхона 5,9 трлн сўм зарар кўрган, шу 10та корхонадан 7таси – энергетикага алоқадор. Инфографика: Давлат активларини бошқариш агентлиги

“Соҳа корхоналари қиёфасида биз энергетика соҳасига бозор кириб бормагани учун жуда катта товон тўламоқдамиз ва бу товон суммаси йилдан йилга ошиб бормоқда. Рақамларда акс этмаган зиённи-ку ҳеч бир қиймат билан ўлчаб бўлмайди”, – дея ёзади Отабек Бакиров.

Мазкур постни Ҳарвард университети докторанти, иқтисодчи Ботир Қобилов ҳамда таниқли Davletovuz Telegram-канали ҳам ўз саҳифаларида улашди.

Узоқ кутилган ҳужжат қачон тайёр бўлади?

Ўзбекистонда энергия ресурслари ва табиий газ бозорлари (ижтимоий ҳимоя кафолатларини белгилаган ҳолда) эркинлаштирилиши керак. Бу – президент фармони билан тасдиқланган 2022 йилги давлат дастурида белгиланган.

Дастурга биноан, 2022 йил апрелгача бу борада президент қарори лойиҳаси ишлаб чиқилиши кўзда тутилган. Лойиҳада қуйидагилар назарда тутилиши керак:

  • энергетика соҳасида соғлом рақобат муҳитини ривожлантириш;
  • барча иштирокчиларга тенг имкониятлар бериш;