Энергия ресурслари бўйича харажатларни камайтирмаган давлат идоралари раҳбарларига чора кўриш бошланади

Президент матбуот котиби Шерзод Асадовнинг хабар қилишича, Менделеев номидаги кимё-технология университетида 100 киловатт қувватли қуёш электр ускунаси ўрнатилиб, йилига 200 минг киловатт соат электр энергияси ишлаб чиқарилмоқда, 36 та сув иситиш қурилмасини ўрнатиш ҳисобига йилига 4,2 млн киловатт соат ёки қарийб 2 млрд сўмлик электр энергияси тежалмоқда.

Йиғилишда Олий таълим вазирлигига ушбу тажрибани барча олийгоҳларда 2022 йилнинг ўзида жорий қилиш топширилди.

Президент вазирлик ва идора, ҳокимлик, маҳалла биноларини ҳам муқобил энергияга ўтказиш вақти келганини таъкидлади. Вазирлик ва идораларда электр ва иссиқлик энергияси харажатларини камида 25 фоизга қисқартириш бўйича дастур ишлаб чиқиш топширилди.

Қайд этилишича, Молия вазирлиги:

• давлат идораларида энергия ресурслари истеъмоли бўйича нормативларни ишлаб чиқади;
• йил якуни билан харажатларни камайтирмаган раҳбарларга нисбатан чора кўриш бўйича таклиф киритади;
• хорижий консультантларни жалб қилиб, барча иқтисодиёт тармоқлари ва ижтимоий объектларда Энергия тежамкорлик миллий дастурини ишлаб чиқади.