Бугун, 5 июль куни «ПСЖ» клуби томонидан ўтказилган матбуот анжуманида жамоанинг янги бош мураббийи таништирилди.
Париж клубини янги мавсумдан бошлаб Кристоф Гальтье бошқарадиган бўлди. Парижликлар янги бош мураббийни «Парк де Пренс» стадионида таништиришди. Франциялик 55 ёшли мутахассис билан 2 йиллик шартнома имзоланди.
«Жамоамизнинг янги бош мураббийи Кристоф Гальтьени сизга таништиришдан мамнунман. Бугундан янги мақсад ҳамда вазифалар билан жамоамизда янги эра бошланмоқда. Биз бу мураббийнинг «Сент-Этьен», «Лилль» ва «Ницца»даги фаолиятини кузатиб, жамоамизга таклиф этдик. Француз мутахассисининг клуб лойиҳасига қўшилганидан жуда ҳам хурсандмиз», - деди «ПСЖ» президенти Носсир Ал-Ҳилайфий тақдимот маросимида.
Маълумот учун, Париж клуби 4 ўйиндан бери Гальтье жамоаларига («Ницца», аввалгиси «Лилль») гол ура олмаяпти.
Аввалроқ, парижликлар Маурисио Почеттинони истеъфога чиқарганди. Аргентиналик мутахассис бир ярим йил давомида клубда фаолият юритди.
