«Қорақалпоқлик оға-иниларимиз ташқи кучлар таъсирига тушмай, тинчлик ва бир бутунликни сақлаб қолади» – сенаторлар

Сенаторлар сўнгги кунларда Қорақалпоғистонда содир бўлган воқеалар бўйича ўз муносабатларини билдириб ўтди. Сенатор Толибжон Мадумаров мамлакатимиз яхлитлиги ва тинчлигини кўра олмаётганлар ҳамда бу каби нохуш ҳодисалар ҳеч қачон ўзбек ва қорақалпоқ бирдамлигига рахна сола олмаслигини таъкидлади.

«Биз қорақалпоқлик оға-иниларимиз билан Янги Ўзбекистонни, мамлакатимизнинг янги саҳифасини биргаликда барпо этамиз! Ишонаманки, қорақалпоқлик оға-иниларимиз, опа-сингилларимиз ташқи кучлар таъсирига тушмайди, неча йиллик тинчлик ва бир бутунликни сақлаб қолади», - дейди сенатор.

Яна бир сенатор Малика Қодирхонова эса ҳам она, ҳам буви сифатида қорақалпоқлик аёлларнинг аҳволини ҳис қилаётганини айтган.

«Мен Қорақалпоғистон Республикасига ҳар гал борганимда қорақалпоқ элининг меҳмондўстлиги, очиқ юз билан кутиб олиши ва у ерда олиб борилаётган ислоҳотларга илиқ муносабатда эканлигини кўриб жуда қувонаман.

…Биз оналар, аёллар тинчлик тарафдоримиз! Четда туриб турли ёвуз ниятини амалга ошириш эвазига Ўзбекистон яхлитлигини кўра олмаётганлар, қорақалпоқ элида нотинчликлар, турли кўнгилсизликларни юзага келтирмоқчи бўлган сепаратистлар ўз мақсадларига эриша олмайди», - дейди Малика Қодирхонова.

Наримон Умаров Қорақалпоғистонда рўй берган оммавий тартибсизликлар орқасида мамлакатда сепаратистик ғояларни тарқатишга қаратилган аввалдан режалаштирилган аниқ мақсадга эга муайян кучлар турганлигини таъкидлаган.

«Уларнинг мақсади – тинч аҳолининг ишончига кириб, уларнинг фикрини чалғитиб, турли тартибсизликлар ва намойишлар орқали мамлакатда беқарорликни юзага келтиришдир», - дейди сенатор.

«Куни-кеча содир этилган тартибсизликлар Қорақалпоғистондаги улкан ислоҳотларни, самарали ишларни издан чиқаришга қаратилган. Бундан кейин бу каби салбий ҳолатларнинг такрорланмаслиги учун «олтовлон ола бўлиб» эмас, балки ҳамжиҳатликда ҳаракат қилишимиз, айниқса бузғунчи ғоялардан ёшларимизни асраб-авайлашимиз керак. Биз бир халқмиз ва Ўзбекистон яхлитлигини биргаликда асраймиз!», - деган сенатор Гулнора Маъруфова.