Бугун, 21 июль куни Марказий банк асосий ставкани белгилаш масаласини кўриб чиқди. Бу ҳақда регулятор матбуот хизмати хабар берди.
«Ҳозирда Ўзбекистон Марказий банки бошқарувининг навбатдаги йиғилиши бўлиб ўтмоқда. Асосий ставкани 1 фоиз пунктга, йиллик 15 фоиз даражасига туширишга қарор қилди», — дейилади Марказий банк хабарида.
2021 йилнинг январь, март, апрель, июнь, сентябр, октябр ва декабр ойларида Марказий банк асосий ставкани ўзгаришсиз – йиллик 14 фоизда сақлаб қолганди.
Жорий йил 20 январида Марказий банк ҳам асосий ставкани йиллик 14 фоиз даражасида ўзгаришсиз қолдирди. 17 март куни Ўзбекистон Марказий банки асосий ставкани 17 фоизга оширди. Бундан ташқари, 21 апрелда асосий ставкани йиллик 17 фоиз даражасида ўзгаришсиз қолдиришга қарор қилинди.
Бундан ташқари, жорий йилнинг 9 июнида Марказий банк асосий ставкани 1 фоиз пунктга, йиллик 16 фоиз даражагача пасайтириш тўғрисида қарор қабул қилди.
2018 йил бошида асосий ставка 14 фоиз даражасида бўлган бўлса, 2019 йилда у 16 фоизгача кўтарилди. 2020 йил апрель ойида ставка 15 фоизга тушди. Коронавирус пандемияси ва оғир иқтисодий вазиятда ҳам курс барибир ўзгармади. 2020 йил охирида ставка 14 фоизга туширилди.
