Intel ҳисоб-китобларига кўра, дунё бўйича шахсий компютерлар савдоси 2026 йилда 12 фоизга, 2027 йилда эса яна 10 фоизга қисқариши мумкин. Бозордаги сустлик камида келаси йилнинг биринчи ярмигача сақланиб қолиши кутилмоқда.
Бунинг асосий сабабларидан бири — хотира чиплари етишмаётгани ва уларнинг нархи кескин ошгани. Ноутбук ва стационар компютер ишлаб чиқарувчилари учун бутловчи қисмлар қимматлашмоқда. Бу тайёр қурилмалар нархини ҳам ошириб, харидорлар талабини пасайтиряпти. Натижада компьютерлар учун Intel процессорларига эҳтиёж ҳам камаймоқда.
Акциялар қулаши 29 октябр куни асосий биржа савдолари якунланганидан кейинги қўшимча савдоларда кузатилди. Компания тўртинчи чоракда 15–16 миллиард доллар тушум олишини прогноз қилган. Таҳлилчилар эса ўртача 17,07 миллиард доллар кутган эди. Бир акцияга тўғри келадиган тузатилган фойда прогнози ҳам кутилмалардан паст — 43 цент ўрнига 25 цент бўлди.
Ваҳоланки, Intel’нинг учинчи чорак натижалари ўсишни кўрсатган. Компания тушуми ўтган йилнинг шу даврига нисбатан 21 фоизга кўпайиб, қарийб 16,5 миллиард долларга етган. Бир акцияга тўғри келадиган тузатилган фойда 52 центни ташкил этиб, таҳлилчилар кутилмаларидан юқори бўлган.
Бироқ компаниянинг турли йўналишларида вазият бир хил эмас. Маълумотлар марказлари ва сунъий интеллект йўналишидаги тушум 78 фоизга ошиб, 7,3 миллиард долларга етган. Шахсий компютерлар учун чиплар йўналишида эса тушум 5 фоизга камайиб, 8,1 миллиард долларга тушган.
Ишлаб чиқаришдаги узилишлар ҳам компания аҳволини қийинлаштирмоқда. Октябрда Intel’нинг Исроилдаги Кирят-Гат заводида содир бўлган, икки киши ҳалок бўлган портлаш ортидан корхона икки ҳафта ишламаган. Компания баҳосига кўра, бу ҳодиса икки чорак давомида жами қарийб 600 миллион долларлик тушум йўқотилишига олиб келиши мумкин. Узилиш сунъий интеллект серверлари учун чип етказиб бериш имкониятларини ҳам чекламоқда.
