Андижонда хориждаги ўқишни кўчириб бериш учун 900 доллар олган шахс ушланди

Андижон вилояти Избоскан туманида фуқароларнинг ўқишини кўчириб беришни ваъда қилган фуқаро ушланди. Бу ҳақда Иқтисодий жиноятларга қарши курашиш департаменти хабар қилди.

Маълум бўлишича, Бош прокуратура ҳузуридаги департамент ҳамда ДХХнинг Избоскан тумани бўлимлари томонидан тезкор тадбир ўтказилган. Унда фуқаро Г.Э. бошқа фуқаролар М. ва Т.нинг қўшни Қирғизистон олий таълим муассасасидаги ўқишларини танишлари ёрдамида Тошкент менежмент ва иқтисодиёт профессионал профил институтига кўчириб беришни 3600 долларга келишиб, олдиндан 900 долларни олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.