Бир йилда 18 нафар ҳайдовчи 100 тагача қоидабузарлик содир этган

Жорий йил 8 август куни Қонунчилик палатасидаги Экологик партияси фракцияси навбатдаги йиғилиши бўлиб ўтди. Унда “Айрим қонун ҳужжатларига йўл ҳаракати хавфсизлиги тизимини такомиллаштиришга қаратилган ўзгартиш ва қўшимчалар киритиш тўғрисида”ги қонун лойиҳаси муҳокама қилинди.

Фото: Kun.uz

Ҳужжат йўлларда инсон хавфсизлигини таъминлаш бўйича белгиланган устувор йўналишларни амалга ошириш мақсадида ишлаб чиқилган. Лойиҳа билан ҳайдовчиларни тайёрловчи таълим субъектлари ва имтиҳон марказларига бўлган талаб ҳамда мезонларни белгилаш, улар бу турдаги фаолиятни амалга ошириш ҳуқуқи учун лицензия ИИВ томонидан бериш тартибини жорий этиш назарда тутилмоқда.

Автомототранспорт воситалари ва шаҳар электр транспорт воситалари ҳайдовчиларини тайёрлаш, қайта тайёрлаш ва малакасини ошириш, уларни имтиҳонлардан ўтказиш тизимини янада такомиллаштириш, мазкур соҳада янги тизимни жорий этиш мақсадида тегишли қонун ҳужжатларига ўзгартириш ва қўшимчалар киритиш таклиф этилмоқда.

Қайд этилишича, ўтган йилда республика бўйича 95 минг нафар ҳайдовчи 5 тадан кўп, 9 минг нафари 20 тагача, 700 нафари 50 тагача, 18 нафари 100 тагача қоидабузарлик содир этган. 10 мингдан зиёд авария содир этилиб, уларда 9 мингдан ортиқ фуқаро жароҳатланган.

Муҳокамалар давомида фракция аъзолари қонун лойиҳасини қўллаб-қувватлашди.